Bu gün, noyabrın 14-i Bakıda məcburi köçkünlərin etiraz aksiyası keçirdikləri bildirilir.
“Qafqazinfo” saytına daxil olan məlumata görə Xətai rayonu, Gəncə prospekti 20 A-da toplaşan vətəndaşlar etirazlarını yolu bağlayaraq ifadə ediblər. Onlar, həmin ərazidə yaşadıqları 16 mərtəbəli binanın qəzalı vəziyyətdə olduğunu bildiriblər.
Onlar binada çatlar yarandığını və sürüşməyə məruz qaldığını qeyd ediblər. Məcburi köçkünlər problemin həll edilməsini tələb ediblər.
Buna da bax: Köçkünlər aylardır qazsız qalıb...
Meydan TV-yə danışan aksiya iştirakçıları isə bildiriblər ki, onlar bu vəziyyətlə bağlı rəsmi qurumları 2 ildir məlumatlandırıblar. Ancaq aradan illər keçsə də lazımı tədbirlər görülməyib.
Hadisəyə, hələlik, Qaçqın və Məcburi Köçkünlərlə İş üzrə Dövlət Komitəsindən və başqa rəsmi qurumlardan münasibət almaq mümkün olmayıb.
Buna da bax: “Yeni Bakı”nın sakinləri prezidentdən kömək istəyir
Bakıda bundan əvvəl də məcburi köçkünlər yaşadıqları bina və yataqxanaların qəzalı olmasına diqqət çəkməkdən ötrü etiraz aksiyası keçiriblər.