“Biz mətbuatın, Azərbaycan cəmiyyətinin, təhlükəsizlik xidmətinin sutkaboyu diqqəti altındaydıq”
“Bizimlə yalnız protokol xidmətinin əməkdaşları ünsiyyətdə idi. Yəni, o adamlar ki, buna hüquqları var idi. Ümumi qeyri-dost aura açıq-aşkar var idi ”
Bunu Bakıda Euronest Parlament Assambleyasının konfransında iştirak edən Ermənistan Milli Məclisinin üzvü, müxalifətin Yelk blokundan olan Mane Tandilyan Azadlıq Radiosunun Erməni Xidmətinə sentyabrın 25-də Yerevana qayıdandan sonra verdiyi müsahibədə deyib.
Ermənistan parlamentinin üzvü Armen Aşotyanla birlikdə Bakıda konfransda olan Tandilyan deyir ki, “biz Bakıda erməni kilsəsinə getmək istədik, ancaq kilsənin ərazisinə girə bilmədik. Dedilər ki, bura Prezident Kitabxanasına məxsusdur”.
Euronest Parlament Assambleyasının konfransı Bakıda sentyabrın 22-də keçirilib və gender bərabərliyi, sağlamlıq, mədəniyyət məsələlərinə həsr olunmuşdu.
Euronest PA isə Avropa Birliyi ilə yaxın əlaqə qurmaq istəyən ölkələrin və Avropa Parlamentinin deputatlarından ibarət parlamentlərarası forumdur.