-
Oktyabrın 26-da ABŞ-da 1963-cü ildə prezident John F. Kennedy-nin qətlə yetirilməsiylə bağlı, indiyədək gizli saxlanmış minlərlə sənəd açıqlanacaq.
İctimaiyyətə heç vaxt açılmamış 3 min sənədin, həmçinin qismən açılmış 30 mindən çox sənədin yayılacağı gözlənir.
Ancaq təhlilçilərin fikrincə, bu sənədlərdən Lee Harvey Oswald-ın 1963-cü il noyabrın 22-də Kennedy-ni Dallasda niyə qətlə yetirməsinə dair elə də əhəmiyyətli yeni detal gözlənilmir.
Ekspertlər deyirlər ki, sənədlər daha CIA və FBI-nin Oswald-ın Kuba və keçmiş Sovet İttifaqından casuslarla əlaqəsini müəyyənləşdirmək cəhdlərinə fokuslanıb. Oswald 1963-cü ilin sentyabrında Meksikaya səfər edib.
ABŞ Konqresi 1992-ci ildə qərar çıxarıb ki, istintaqa dair bütün sənədlər 25 il ərzində ictimaiyyətə açıqlansın.
Prezidentin sənədlərin açıqlanmasını bloklamağa səlahiyyəti çatır, amma Donald Trump ötən həftə deyib ki, bunu eləməyəcək.