Gürcüstanın Dövlət Təhlükəsizlik Xidməti (SUS) əməliyyat zamanı azı bir şübhəlinin saxlandığını bildirir.
SUS-un sözçüsü Nino Giorgobiani noyabrın 22-də jurnalistlərə deyib ki, polis və təhlükəsizlik qüvvələri paytaxtın İsani rayonunda antiterror əməliyyatını davam etdirir, bir neçə silahlını da ələ keçirməyə çalışırlar.
Giorgobiani-nin sözlərincə, əməliyyatın hədəfi “terror təşkilatıyla” əlaqələrdə şübhəli bilinən “xarici vətəndaşlardır”.
Gürcüstan mediası isə silahlıların İslam Dövləti (İŞİD) ekstremistləriylə əlaqələrdə şübhəli bilindiyini yazır.
***
Gürcüstan paytaxtı Tbilisidə təhlükəsizlik qüvvələrinin silahlılara qarşı əməliyyat apardığı bildirilir. Media əməliyyatın paytaxt kənarındakı yaşayış məkanlarından birində keçirildiyini yazır.
İnsident noyabrın 22-də başlanıb. Dövlətə məxsus Birinci Kanalın məlumatına görə, təhlükəsizlik qüvvələri iki xaricini tutmağa çalışır. Ərazi boşaldılıb.
Media ərazidə partlayış, ara-sıra atəş səsləri eşidildiyini bildirir.
Şübhəlilər xarici “terror təşkilatlarıyla” kontakt yaratmaqda suçlanır. Həmin kontaktların mahiyyəti açıqlanmayıb.