Qazaxıstan hakimiyyəti bildirir ki, Niderland məhkəməsi 22 milyard dollarlıq neft sərvətinin dondurulması barədə qərarı ləğv edib.
Ədliyyə Nazirliyi yanvarın 24-də yaydığı bəyanatda qeyd edir ki, digər vəsaitlərin dondurulmasıyla bağlı Belçikada çıxarılmış məhkəmə qərarının da ləğvinə çalışır.
Neft fondunun Bank of New York Mellon-dakı vəsaiti oktyabrda moldovalı biznesmen Anatolie Stati-nin qaldırdığı məhkəmə iddiası əsasında dondurulmuşdu.
Stati, oğlu Gabriel və ailənin idarə etdiyi iki şirkət illərdir Qazaxıstan prezidenti Nursultan Nazarbaev-ə qarşı hüquqi çəkişmə aparır.
Qazaxıstanın neft-qaz sənayesinə sərmayə qoymuş Statilər dövlət tərəfindən qısnamaya məruz qaldıqlarını, qoyduqları sərmayəni ucuz satmağa məcbur edildiklərini bildirirlər.
Qazaxıstan iddiaları rədd edərək, ABŞ məhkəməsində əks iddialar qaldırıb.