Rusiyada tanınmış deputat Federasiya Şurasının müdafiə komitəsində sədr müavinliyindən istefa verib və adını çəkmədiyi tənqidçilərin onun “açıqlığ”ından xoşlanmadığını bildirib. Bu barədə Rusiya mediası fevralın 12-də yazıb.
Frants Klintsevich müdafiə və təhlükəsizlik komitəsindəki vəzifəsindən istefasının səbəbini açıqlamayıb. Amma “Kommersant” qəzetinə deyib ki, “görünür, Federasiya Şurasında heç də hamının açıqlığımdan xoşu gəlmir”.
*** Buna da bax: İsrail İrana xəbərdarlıq edir
Federasiya Şurası fevralın 14-də keçiriləcək plenar iclasda Klintsevich-in istefasıyla bağlı qərar verəcək.
RAKET HANSI ÖLKƏDƏN GÖNDƏRİLİB?
Rusiya mediası bu ayın əvvəlində Klintsevich-ə istinadla yazıb ki, Rusiya kəşfiyyatı fevralın 3-də Rusiyanın Su-25 hərbi təyyarəsinin Suriyada yaraqlılar tərəfindən sovet istehsalı olan Igla MANPAD raketiylə vurulması qənaətinə gəlib.
Həmin hücuma görə Hayat Tahrir al-Sham qrupu məsuliyyəti üzərinə götürmüşdü.
Klintsevich-in raketin sovet istehsalı olmasıyla bağlı dediklərini Rusiya kəşfiyyat rəsmiləri dərhal təkzib edib.
Klintsevich daha öncə Rusiyanın Interfax agentliyinə demişdi ki, yaraqlılara MANPAD-ın Birləşmiş Ştatlar tərəfindən verildiyinə inanır. Amma ABŞ Dövlət Departamenti bu fikri təkzib edib.
*** Buna da bax: Türkiyənin hərbi vertolyotu Suriya ərazisində vuruldu
Harvard Universitetinin Rusiya Məsələləri layihəsinin direktoru Simon Saradzhyan Twitter-də yazıb ki, Klintsevich raketin sovet istehsalı olduğunu dediyi üçün “istefa verməli olub”.
“Məndən ötrü ən maraqlı sual budur ki, təyyarənin Igla ilə vurulduğu doğrudurmu və belədirsə, o, hansı ölkədən göndərilib?” – o yazıb.
Suriya yaraqlılarının Rusiya hərbi təyyarəsini vurması ilk dəfədir. 2016-cı ilin iyulunda yaraqlılar Rusiya istehsalı olan Suriya vertolyotunu vurmuşdular, içində Rusiyadan heyət üzvləri vardı.