Azexport.az portalına cari ilin yanvar ayında 81.5 milyon dollar dəyərində ixrac sifarişi daxil olub. Bu haqda İqtisadi İslahatların Təhlili və Kommunikasiya Mərkəzinin (İİTKM) «İxrac İcmalı»nın 2018-ci ilin fevral sayında deyilir.
İcmalda vurğulanır ki, 2018-ci ilin yanvar ayında qeyri-neft sektoru üzrə ixrac 123 milyon dollar təşkil edib ki, bu da 2017-ci ilin müvafiq dövrü ilə müqayisədə ixracın 1/3 həcmdə artması deməkdir.
Bu ilin yanvarında ən çox qeyri-neft məhsulları Rusiya Federasiyasına ixrac edilib (36.8 milyon dollar): «Bununla yanaşı, yanvar ayında Türkiyəyə 23 milyon, İsveçrəyə 17.9 milyon, Gürcüstana 11.3 milyon və Çinə 4.4 milyon dollar dəyərində qeyri-neft sektoruna aid mal ixrac olunub».
«İxrac İcmalı»nda qeyri-neft sektoru üzrə əsas ixracatçı şirkətlərin də reytinqi açıqlanıb.
2018-ci ilin yanvarında «Azərkosmos» ASC tərəfindən dünyanın 15 ölkəsinə peyk telekommunikasiya xidmətlərinin ixrac edildiyi və qurumun bu xidmətdən 423 min dollar gəlir əldə etdiyi də bildirilir.
Həmçinin deyilir ki, 2016-cı illə müqayisədə 2017-ci ildə Azərbaycana gələn xarici vətəndaşların bank kartları vasitəsilə apardıqları əməliyyatların dəyəri 70 faiz artaraq, 1 milyard 22 milyon manat təşkil edib.