Qırğızıstan prezidentinin idarəsi Jeenbekov-un hökuməti buraxdığını bildirir.
***
Qırğızıstan parlamenti hökumətə etimadsızlıq göstərib. Bu, keçmiş prezident Almazbek Atambaev-lə ölkənin indiki lideri Sooronbai Jeenbekov arasında qarşıdurma yarandığı bir vaxtda baş verir.
120 deputatdan 105-i hökumətin əleyhinə səs verib. Ölkə konstitusiyasına görə, son qərarı prezident verəcək. O, hökuməti ya istefaya göndərə bilər, ya da saxlanmasına qərar verə bilər.
39 yaşlı baş nazir Sapar Isakov Atambaev-ə yaxınlığı ilə seçilir, hökumətə 2017-ci il avqustun 25-dən başçılıq edir.
Ölkə konstitusiyası Atambaev-in ikinci müddətə prezident seçilməsinə imkan verməyib.
Ötən ilin oktyabrında prezident seçilmiş Jeenbekov 2016-cı ilin aprelindən 2017-ci ilin avqustunadək Qırğızıstanın baş naziri olub.
Rəsmi nəticələrə görə, o, 15 oktyabr seçkisində səslərin 54 faizini toplayıb. Ancaq tənqidçilər Atambaev-in hakimiyyət resurslarından Jeenbekov-un qələbəsini təmin etmək üçün faydalandığını bildirib.
Ötən il noyabrın 27-də Jeenbekov Atambaev-ə milli qəhrəman adı verib.
Atambaev vəzifədən gedəndən sonra fəaliyyəti ilə çox da seçilməyib. Ancaq martın 31-də hakim Sosial Demokratik Partiyanın sədri seçilincə Jeenbekov-u bir neçə dəfə açıq tənqid edib.