Birləşmiş Ştatların keçmiş prezidenti George H.W. Bush infeksiya diaqnozuyla Hyustonda xəstəxanaya yerləşdirilib. Bu, həyat yoldaşı Bsrbaranın ötən həftəsonu keçirilmiş dəfn mərasimindən sonra baş verib.
Ailənin sözçüsü Jim McGrath aprelin 23-də Twitter-də yazıb ki, 93 yaşlı Bush “müalicəyə reaksiya verir və sağalmaq üzrədir”. Sözçü onun qanına infeksiya düşdüyünü açıqlayıb.
Barbara Bush-un aprelin 21-də dəfn mərasimində əri, keçmiş prezidentlər Bill Clinton, Barack Obama, George W. Bush həyat yoldaşlarıyla birlikdə və birinci ledi Melania Trump iştirak edib.
Bush-ların evliliyi ABŞ tarixində ən uzunömürlü prezident nikahı sayılır.
Ata Bush-da Parkinson xəstəliyi yarandığından əlil arabasından istifadə edir. O, son illər respirator problemlərdən bir neçə dəfə xəstəxanada müalicə alıb.