Əfqanıstandakı Taliban silahlı qruplaşması aprelin 25-də onlayn bəyanat yayaraq yaz hücumları mövsümünü açıq elan edib. Qruplaşma “Al-Khandaq” adını verdiyi hücumların “amerikalı işğalçıların əzilməsi, öldürülməsi və əsir götürülməsinə” fokuslanacağını bildirib.
Amerikalıların “daxildəki tərəfdarları” – Əfqanıstan hökuməti və hərbçiləri isə ikinci dərəcəli sayılıb.
Bəyanatda hücumun Talibanın Hərbi Komissiyası tərəfindən təşkil olunduğu bildirilir. Bu hücum 627-ci ildə Səudiyyə Ərəbistanındakı Xəndək müharibəsinin şərəfinə adlandırılıb. O zaman 3 min müsəlman kişi Mədinə ətrafında xəndəklər qazıb, qeyri-müsəlman ərəblərin və yəhudilərin bir ay çəkən mühasirəsindən salamat çıxıb.
Bu arada Əfqanıstanda yeni hücumlar dalğası başlayıb. Aprelin 24-də Fərah və Qəzni vilayətlərində Talibanın ayrı-ayrı hücumlarında azı 11 əfqan əsgər və polis əməkdaşı öldürülüb.
Aprelin 23-də isə Əfqanıstanın qərbində 18 əsgər və polis əməkdaşı qətlə yetirilmişdi.