«Son illər Lerikdə belə güclü zəlzələ olmamışdı».
Bunu Lerik Rayon İcra Hakimiyyəti başçısının müavini, Fövqəladə Hallar Komissiyasının sədri Habil Məlikov bildirib. Onun sözlərinə görə, dünən, avqustun 28-də baş verən zəlzələdə köhnə tikintilərdə çatlar əmələ gəlib.
Müavin vurğulayıb ki, söhbət 40-a yaxın evdən gedir: «Yerlərdən belə məlumatlar daxil olur, bunun sayının artacağı da istisna deyil».
H.Məlikov bildirib ki, hazırda sənədləşdirmə işləri gedir və zəlzələdən zərər görmüş vətəndaşlara dövlət dəstəyi nəzərdə tutulur.
Xatırlatma
Avqustun 28-i saat 17 radələrində Lerik rayonu ərazisində 5.1 gücündə zəlzələ baş verib. Zəlzələ ətraf rayonlarda 3-4 bal gücündə hiss edilib. Bundan sonra həmin ərazilərdə nisbətən zəif daha bir neçə zəlzələ olub.