Ermənistan Rusiyadan 100 milyon dollarlıq yeni müdafiə krediti götürmək barədə danışıqlar aparır. Bunu sentyabrın 12-də keçirdiyi mətbuat konfransında Ermənistanın müdafiə naziri David Tonoyan deyib.
Nazir qeyd edib ki, Yerevan Moskvayla çoxfunksiyalı hərbi aviasiya əldə etmək yönündə də danışıqlar aparır.
***
Rusiya Ermənistana silah təchizatını davam etdirməyə razılaşıb. Bunu Ermənistanın baş naziri Nikol Pashinian “Kommersant” qəzetinə müsahibəsində deyib.
Qəzet müsahibəni sentyabrın 9-da dərc edib. Bir gün öncə isə Pashinian Moskvada Rusiya prezidenti Vladimir Putin-lə görüşüb.
“Rusiyanın silahları mütəmadi təchiz etməsinə razılaşdıq”, – Pashinian Putin-lə görüşlərdə hansı razılaşmaların əldə olunması barədə sualı belə cavablandırıb.
Baş nazirin deməsinə görə, silahların maliyyələşməsi kredit yoluyla təmin olunacaq, “başqa variantlar da götür-qoy olunacaq”.
2017-ci ilin noyabrında Ermənistan Rusiyadan silah satışının maliyyələşməsindən ötrü Moskvadan 100 milyon dollar borc alıb. TASS dövlət xəbər agentliyinin yazmasına görə, kredit Yerevana 2018-2022-ci illər üçün ayrılıb.
Robert Kocharian, arxiv fotosu
Hazırda Ermənistan- Azərbaycan Dağlıq Qarabağ münaqişəsilə bağlı gərginlik qalmaqdadır.
MÜNASİBƏTLƏRDƏ “SUALLAR”
Pashinian-Putin görüşü tələm-tələsik təşkil olunub. Bunda öncə 2008-ci il etirazlarının Pashinian hökuməti tərəfindən araşdırılmasının Moskvayla gərginliyi artırdığı xəbərləri yayılıb.
Prokurorlar Ermənistanın keçmiş prezidenti Robert Kocharian və KTMT-nin sədri Yuri Khatchaturov-a konstitusion quruluşu devirmək ittihamı irəli sürüblər. Kreml bu hərəkətləri tənqid edib.
Rusiya-Ermənistan əlaqələrinə dair suallar Moskvaya yaxınlığı ilə seçilən Serzh Sarkisian devriləndən sonra, mayda Pashinian hakimiyyətə gəlincə baş qaldırıb.
Ancaq görüşdən öncə Putin deyib ki, Moskva-Yerevan münasibətləri “bütün istiqamətlərdə möhkəm” inkişaf edir.
“Bu, siyasi münasibətlərə, hərbi sahəyə, təhlükəsizlik və iqtisadi əməkdaşlığa aiddir”, – o vurğulayıb.
Pashinian isə münasibətlərdə “suallar” olduğunu etiraf edib.
“Allah bizi münasibətlərimizdə sualların olmayacağı durumdan qorusun, çünki bu, bizim heç münasibətimizin olmaması demək olar”, – o vurğulayıb.
Pashinian müsahibədə deyib ki, Putin onun Yerevana səfər etmək dəvətini qəbul edib, “bu ilin sonunadək alınmasa belə, gələn ilin əvvəlinə”.
Baş nazir sentyabrın 14-də Parisə gedəcək, Fransa prezidenti Emmanuel Macron-la görüşəcək. Fransada yarım milyonadək etnik erməni yaşayır, iki ölkəni mədəni əlaqələr birləşdirir.