Tacikistanda iyulun sonunda dağ yolunda dörd əcnəbi velosipedçinin qətlində şübhəli bilinən 17 tacik məhkəmə qarşısına çıxarılıb.
Oktyabrın 23-də başlanan proses Düşənbədəki 1 saylı təcridxanada qapalı keçirilir.
Təqsirləndirilənlərin qohumları da binaya buraxılmayıb.
Dörd velosipedçi – bir amerikalı kişi və bir qadın, bir holland və bir isveçrəli iyulun 29-da öldürülüblər. Bir qrup şəxs onlara hücum edərək bıçaqlayıb.
Paytaxtdan 150 kilometr cənubda baş vermiş insidentdən iki əcnəbi velosipedçi salamat çıxıb.
Hücumda şübhəli bilinən beş nəfərdən yalnız biri – Hussein Abdusamadov təqsirləndirilənlər sırasındadır. Qalan dörd nəfər təhlükəsizlik qüvvələri tərəfindən öldürülüb.
Təqsirləndirilənlərdən 16-sı hücumun təşkilində, hücum barədə məlumat verməməkdə şübhəli bilinir.
Hücuma görə məsuliyyəti İslam Dövləti (İŞİD) silahlı qruplaşması üzərinə götürüb.