Səudiyyə Ərəbistanının baş prokuroru Saud al-Mojeb İstanbuldakı həmkarıyla jurnalist Jamal Khashoggi-nin öldürülməsini müzakirə edir. Bu haqda Türkiyənin Anadolu xəbər agentliyi məlumat yayıb.
Türkiyə Səudiyyənin İstanbuldakı konsulluğunda jurnalistin ölümüylə əlaqədar saxlanmış 18 səudiyyəlinin ekstradisiyasını istəyir. Khashoggi oktyabrın 2-də konsulluğa girəndən sonra qətlə yetirilib.
Amma Səudiyyənin xarici işlər naziri Adel al-Jubeir deyib ki, şübhəlilər krallıqda mühakimə olunacaqlar.
Anadolu-nun məlumatına görə, al-Mojeb oktyabrın 29-da İstanbulda həmkarı Irfan Fidan-la görüşə girib. Onun konsulluğa da baş çəkəcəyi bildirilir.
“Washington Post”un yazarı, Səudiyyənin vəliəhd şahzadəsi Muhammad bin Salman-ın tənqidçisi olan Khashoggi-nin ölümü beynəlxalq ictimaiyyəti qəzəbləndirib.
Al-Mojeb ötən həftə dedi ki, bu qətl planlaşdırılıb. Daha öncə yayılmış rəsmi məlumatda isə jurnalistin təsadüfən öldürüldüyü deyilirdi.
Türkiyə qətllə bağlı informasiyanı digər ölkələr – Birləşmiş Ştatlar, Almaniya, Fransa və Rusiyayla paylaşdığını bəyan edib.