Prezident İlham Əliyev və xanımı Mehriban Əliyeva bu gün, noyabrın 5-də Ağdam rayonuna səfər edib.
Ağdam rayonunun hazırda mərkəzi, Quzanlı qəsəbəsində icra hakimiyyətinin başçısı Vaqif Həsənov görülən işlər barədə məlumat verib.
Ölkə başçısı rayon rəhbərliyinə tapşırıqlar verib.
Prezident İ.Əliyev daha sonra Ağdam rayonunda əsaslı şəkildə yenidən qurulan Quzanlı-İmamqulubəyli-Orta Qərvənd-Xındırıstan avtomobil yolunun açılışına qatılıb. Açılışda bildirilib ki, Quzanlı-İmamqulubəyli-Orta Qərvənd-Xındırıstan avtomobil yolu 29 min nəfərin yaşadığı 14 yaşayış məntəqəsini birləşdirir.
Prezidenti İ.Əliyev və xanımı daha sonra Heydər Əliyev Fondunun təşəbbüsü ilə inşa olunan Ağdam Muğam Mərkəzinin açılışında iştirak ediblər.
Muğam Mərkəzi ilə tanışlıqdan sonra prezident və xanımı rayonun incəsənət xadimləri ilə görüşüblər.
Xatırlatma
Ağdam rayonunun mərkəzi Ağdam şəhəri 1993-cü ildə işğal edilib. Ağdam şəhəri də daxil, rayonun bir sıra kəndləri hazırda Ermənistanın nəzarəti altındadır.
Bu rayon hazırda Azərbaycan və Ermənistan silahlı qüvvələrinin təmas xəttində yerləşir.
Qarabağ münaqişəsi ilə bağlı Azərbaycan və Ermənistan silahlı qüvvələri üz-üzə dayanıb. Bu münaqişə 1988-ci ildə başlayıb. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi, ona bitişik 7 rayon və bəzi əlavə kəndlər işğal edilib.
Dağlıq Qarabağ münaqişəsinin həlli ilə bağlı sülh danışıqları ATƏT-in Minsk qrupu həmsədrlərinin vasitəçiliyi ilə aparılır. ABŞ, Rusiya və Fransa həmsədr dövlətlərdir.