Ötən il Əfqanıstanda tiryək istehsalı 29 faiz azalıb və bu da əsasən quraqlıqla bağlıdır. Bu haqda BMT-nin narkotiklərlə mübarizə agentliyi hesabat yayıb.
Noyabrın 19-da BMT-nin Narkotiklər və Cinayətkarlıqla Mübarizə İdarəsi illik hesabatında bildirib ki, tiryək istehsalının 9 min tondan 6 min 400 tona düşməsi həm də bu məhsulun becərildiyi torpaq sahələrinin azalmasıyla bağlıdır.
Hazırda xaş-xaş 263 min hektar ərazidə becərilir. Bu, ötən ildəkindən 20 faiz azalma deməkdir.
Əfqanıstan Tiryək Sorğusu adlı hesabatı BMT agentliyi Əfqanıstanın Narkotiklərlə mübarizə Nazirliyi ilə birgə hazırlayıb.
“Azalmaya baxmayaraq, xaş-xaş becərilən ümumi ərazi dünyada ikinci yeri tutur. Bu, regionda təhlükəsizliyə əngəl olaraq qalır”, – BMT agentliyinin icraçı direktoru Yury Fedotov deyib.
Hesabata görə, quru tiryəkin kilosunun qiyməti 94 dollara düşüb ki, bu da 2004-cü ildən bəri ən aşağı səviyyədir və xaş-xaş becərilməsinin azalmasına təsirini göstərib.
Bu il 406 hektar xaş-xaş ərazisi məhv edilib. Ötən il bu rəqəm 750 idi.
Əfqanıstanın 34 vilayətindən yalnız 10-da xaş-xaş əkilmir.
Əfqanıstan dünyada ən böyük tiryək istehsalçısıdır. Beynəlxalq donorlar son on ildə ölkədə narkotiklərlə mübarizəyə milyardlarla dollar xərcləyiblər. Fermerlər digər məhsullar əkməyə də həvəsləndirilir.