Qırğızıstanda keçmiş baş nazir müavini korrupsiya ittihamları ilə həbs olunub.
Duishenbek Zilaliev “qanunsuz varlanma”da ittiham olunur, barəsində həbs qətimkan tədbiri seçilib. Məlumatı Dövlət Milli Təhlükəsizlik Xidməti dekabrın 10-da yayıb.
Məlumatda deyilir ki, keçmiş məmurun mülkiyyətində olan 900 min dollarlıq bəyan edilməmiş nağd pul və mülkiyyət aşkarlanıb və bunları necə əldə etdiyini izah edə bilməyib.
Zilaliev 2017-ci ildə bir neçə ay baş nazirin müavini işləyib. O, daha öncə Dövlət Sənaye, enerji və Mineral Ehtiyatlar Komitəsinə başçılıq edib.
Azərbaycan məhkəməsi isə Qırğızıstan Gömrük Xidmətinin keçmiş rəhbəri Adamkul Junusov-un ekstradisiyası barədə qərar çıxarıb. Bunu dekabrın 10-da AzadlıqRadiosu-na Qırğızıstan Dövlət İqtisadi Cinayətlərlə Mübarizə Xidmətindən bildiriblər.
Junusov dekabrın 5-də Heydər Əliyev aeroportunda Qırğızıstan rəsmilərinin xahişilə saxlanıb.
Bişkek maliyyə polisi onu 2013-2016-cı illərdə Gömrük Komitəsinə rəhbərlik edən zaman xəzinəyə 166 milyon soma (2,1 milyon dollar) başa gələn “korrupsiya” əməllərində suçlayır.
Yaydan bəri Junusov-un harada olduğu bəlli deyildi.