Bakı şəhərinin bir sıra dənizkənarı ərazilərində yeni ictimai çimərliklərin yaradılması işlərinə başlanıb.
Bu barədə Bakı Şəhər İcra Hakimiyyətindən bildiriblər.
Paytaxt rəhbərliyindən verilən məlumata görə, bu addımın atılması vətəndaşlardan daxil olan müraciətlərlə bağlıdır.
İcra hakimiyyətindən qeyd ediblər ki, bu çimərliklərin ilkin mərhələdə Səbail rayonu və Novxanı qəsəbəsində fəaliyyətə başlaması gözlənir. Onlar yaxın günlərdə fəaliyyətə başlamalıdırlar.
«Bu çimərliklərə giriş pulsuz olacaq, müvafiq qurumlar tərəfindən ora nəzarət ediləcək», - icra hakimiyyətindən vurğulayıblar.
Xatırlatma
Bakı şəhərində və Xəzər dənizinin Azərbaycana aid sahillərindəki bir sıra çimərliklərdə suyun normalara cavab vermədiyi bildirilir. Bununla bağlı Ekologiya və Təbii Sərvətlər Nazirliyinin bu il keçirdiyi monitorinqlərdə bildirilib.
Üstəlik, vətəndaşlar tez-tez də bir çox çimərliklərdə girişin pullu olmasından şikayətlənirlər. Hərçənd, rəsmi qurumların özləri çimərliklərdə girişin pullu olmasını qanunsuz sayırlar.