AXCP: S.İsgəndərli 60 sutka həbs edilib
Avqustun 20-də saxlandığı bildirilən AXCP fəalı Səhlədar İsgəndərlinin 60 sutka inzibati qaydada həbs olunduğu açıqlanıb.
Bu barədə AzadlıqRadiosuna AXCP Gənclər Komitəsindən bildiriblər.
Açıqlamaya görə, S.İsgəndərli ailəsinə bildirilmədən məhkəməyə aparılaraq İnzibati Xətalar Məcəlləsinin 206-cı (Qanunsuz olaraq narkotik vasitələrin, psixotrop maddələrin istehlakı, satış məqsədi olmadan şəxsi istehlak miqdarında hazırlanması, əldə edilməsi, saxlanılması, daşınması və ya göndərilməsi) maddəsi ilə 60 sutka inzibati həbslə cəzalandırılıb.
Amma bu məlumatı, hələlik, rəsmi qurumlardan dəqiqləşdirmək mümkün olmayıb.
+++
Azərbaycan Xalq Cəbhəsi Partiyasının (AXCP) iki fəalının saxlandığı bildirilir.
Bu partiyadan verilən məlumata görə, gənc fəal Səhlədar İsgəndərli avqustun 20-də saxlanıb. Bildirildiyinə görə, o, iki gün qabaq, avqustun 19-da Bakının mərkəzində ölkədəki siyasi vəziyyətə etiraz olaraq təkadamlıq aksiya keçirib və bu üzdən saxlanıb.
AXCP-dən onun ailəsinə istinadən əlavə ediblər ki, S.İsgəndərlinin Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsində saxlandığı güman olunur.
Amma bu məlumata, hələlik, Daxili İşlər Nazirliyi və sözügedən idarədən münasibət almaq mümkün olmayıb.
AXCP-nin başqa bir məlumatında isə qeyd edilir ki, avqustun 20-də həmçinin, daha bir gənc fəal Vilayət Məmmədova 30 sutka inzibati həbs verilib. «Səbəb kimi, əsasən, Facebook-da sərt yazıları göstərilir. Amma rəsmi ittiham bilinmir», - AXCP-nin rəhbər üzvlərindən biri qeyd edib.
Rəsmi qurumlar AXCP fəallarının saxlanılması ilə bağlı məlumat yaymayıb. V.Məmmədovun da 30 sutka inzibati həbs cəzası alması ilə bağlı məlumatı məhkəmə orqanlarından dəqiqləşdirmək və bütün bunlara rəsmi qurumların münasibətini almaq cəhdləri nəticə verməyib.
Xatırlatma
AXCP-dən verilən məlumata görə, bu il müxtəlif vaxtlarda onların 70-dən çox fəalları inzibati qaydada cəzalanıb. Onlardan 54 nəfərinin 10-30 sutka inzibati həbsə məhkum edildiyi bildirilir. Partiya fəallarından 5 nəfərin isə təkrarən inzibati həbs edildiyi qeyd olunub. Partiyadan vurğulandığına görə, onların əksəriyyəti polisin qanuni əmrinə tabe olmamaqda təqsirləndirilib. Bu il AXCP-nin 24 fəalının isə 50 manatdan 500 manatadək inzibati qaydada cərimə edildiyi iddia olunur. Partiya onların hamısının siyasi mövqelərinə görə şərləndiyini açıqlayıb. Amma bu açıqlanan rəqəmləri də rəsmi qurumlardan dəqiqləşdirmək mümkün olmayıb. Üstəlik, Azərbaycanın rəsmiləri, bir qayda olaraq, bəyan edirlər ki, ölkədə bütün fundamental azadlıqlar qorunur. Onların fikrincə, ölkədə heç kim dinc siyasi fəaliyyətinə görə təzyiqlərlə üzləşmir.