Şimali Koreya ABŞ-ın keçmiş vitse-prezidenti, 2020-ci il prezident seçkisində Demokrat Partiyasından aparıcı namizəd Joe Bidenə “qudurmuş it” deyib, onun “çubuqla ölənədək döyülməli olduğunu” bildirib.
Noyabrın 14-də açıqlanmış bu ifadə hətta Şimali Koreyanın standartları ilə belə qeydi-adi dərəcədə qəddar səslənir. Bu ölkə düşmənlərini çox vaxt qeyri-adi leksikonla təsvir edir.
Biden “ağılsızcasına Şimali Koreyanın ali rəhbərliyinin şərəfini qaralamağa cəsarət edib”, – Pxenyanın rəsmi KCNA xəbər agentliyi bildirib.
“Biden kimi qudurmuş itlərə icazə verilsə çox adamı incidə bilərlər… Onları çubuqla ölənədək döymək lazımdır. Bunu etmək Birləşmiş Ştatlar üçün də yaxşı olardı”, – bəyanatda vurğulanır.
Bidendə “demensiyanın son mərhələsinin əlaməti özünü göstərir. Görünür, onun həyatdan getməsinin vaxtı çatıb”, – bəyanatda deyilir.
Bidenin seçki kampaniyası bu həftə yaydığı reklamda Prezident Donald Trump-ın xarici siyasəti tənqid olunur, deyilir ki, “diktatorlar və tiranlar təriflənir, müttəfiqlərimiz kənara atılır”.
“Tiranlar” sözü eşidilən kimi Trump ilə Şimali Koreya lideri Kim Jong Un-un ötən ilki samitdə əl sıxdıqları foto görünür.