Pakistanın keçmiş baş naziri Nawaz Sharif müalicə almaqdan ötrü ölkənin şərqindəki Lahor şəhərindən Londona yola düşüb.
Onun noyabrın 19-da xüsusi təyyarə ilə yola düşdüyü bildirilir.
Ötən həftə Lahor Ali Məhkəməsi onun xaricdə müalicə almasına icazə verib.
Keçmiş baş naziri qardaşı, müxalifətdə olan Pakistan Müsəlman Liqası-Navaz (PML-N) partiyasının lideri Shehbaz Sharif, həkim briqadası müşayiət edir.
Yola düşməzdən qabaq Sharif-ə dərmanlar verilib ki, səyahət vaxtı səhhəti sabit qalsın.
Sharif ilin əvvəlində korrupsiyada təqsirli bilinərək 7 illik həbsə məhkum edilib. Oktyabrın 21-də onun səhhəti ağırlaşdığından həbsxanadan xəstəxanaya aparılıb.
Özü ittihamları rədd edir, siyasi motivli adlandırır.