Gürcüstan məhkəməsi 10 müxalifətçini 4 gündən 13 günədək inzibati həbsə məhkum edib. Onlar bu həftənin əvvəlində hökumətə qarşı etiraz aksiyası zamanı hüquq-mühafizə əməkdaşlarına müqavimətdə ittiham olunurlar.
Noyabrın 21-də axşamadək Tbilisi Şəhər Məhkəməsi daha 25 etirazçıyla bağlı qərar verməlidir.
Noyabrın 18-də parlament binası qarşısına minlərlə nümayişçi yığışıb, növbədənkənar seçki tələb edib. Buna deputatların proporsional seçkiyə keçidi rədd eləməsi səbəb olub.
Buna da bax: Tbilisidə etiraz davam edir, parlamentin təhlükəsizliyi gücləndirilibNoyabrın 21-də bir qrup fəal simvolik olaraq məhkəmələrin giriş qapılarını qıfıllamağa çalışıblar.
Müxalifət partiyalarının fikrincə, Gürcüstanın seçki sistemi hakim Gürcü Arzusu partiyasının xeyrinədir.
Mövcud qarışıq sistemin gələn ildən proporsional sistemlə əvəzlənməsi tələb olunurdu və bu tələb iyun-iyulda Tbilisidə etirazlarda da səsləndirilirdi.
Gürcü Arzusu partiyası, milyarder qurucusu və lideri Bidzina Ivanishvili ilə birlikdə bu islahatı dəstəkləyirdi. Ancaq parlament noyabrın 14-də konstitusiyaya dəyişikliyi qəbul eləmədi.
Birləşmiş Ştatlar və Avropa Birliyi Gürcüstan hökumətini, siyasi partiyaları və vətəndaş cəmiyyətini “dinc və sayqılı dialoq” aparmağa çağırıb.