Əfqanıstanın şərqindəki Xost vilayətində yol kənarına qoyulmuş bomba partladılıb, bir maşında gedən azı 10 dinc sakin həlak olub.
Daxili İşlər Nazirliyinin sözçüsü Nasrat Rahimi deyib ki, partlayış dekabrın 17-də səhər Ali Şer rayonunda törədilib.
Ölənlərin üçü uşaq, ikisi qadın, beşi kişidir, Rahimi deyib.
Vilayət valisinin sözçüsü Talib Mangal-ın sözlərinə görə, ölənlərin hamısı bir ailənin üzvləri olub, Loqar vilayətinə dəfn mərasiminə gedirlərmiş.
Rahimi partlayışa görə Taliban yaraqlılarını günahlandırıb.
Silahlı qruplaşma isə hələlik, açıqlama yaymayıb.
BMT-nin Əfqanıstandakı Yardım Missiyası (UNAMA) dinc əfqanlara qarşı “zorakılığın görünməmiş həddə çatmasından dərin narahatlığ”ını bildirib.
UNAMA bu ilin ilk 9 ayı ərzində bu ölkədə 2 min 563 nəfərin öldürüldüyünü, 5 min 676 nəfərin yaralandığını qeyd edir.