İran hərbi təyyarəsi ölkənin şimal-qərbindəki Ərdəbil vilayətində Savalan sönmüş vulkanı yaxınlığında dağa dəyib.
Xəbəri dövlət mediası dekabrın 25-də yayıb.
IRNA yerli rəsmilərə istinadla qəza yerinə xilasedicilərin göndərildiyini xəbər verir.
Hadisə vaxtı itkilər, təyyarədə neçə nəfərin olması barədə hələlik, informasiya yoxdur.
Vilayət rəhbərliyinin sözçüsü IRNA-ya deyib ki, pis hava şəraiti üzündən İran Qırmızı Ayparasının xilasediciləri qəza yerinə çata bilməyiblər.
Təyyarənin Rusiya istehsalı olan MiG-29 olduğu bildirilir. Pilot yeni təmirdən çıxmış təyyarə ilə sınaq uçuşu edirmiş və Təbrizdəki hava bazasından qalxıb.
İranın hava qüvvələrində 1979-cu il İslam İnqilabından öncə ABŞ-dan alınmış təyyarələr, həmçinin Rusiya istehsalı olan MiG və Sukhoi təyyarələri var.
On illər boyunca Qərbin sanksiyaları üzündən İran təyyarələrini yeniləyə bilməyib.