Fevralın 9-da keçiriləcək növbədənkənar parlament seçkiləri ilə bağlı Mərkəzi Seçki Komissiyasının (MSK) «Seçki – 2020» Müstəqil Media Mərkəzi yaradılıb.
Yanvarın 13-də Bakı şəhərindəki Hilton otelində MSK sədri Məzahir Pənahov və komissiya üzvlərinin iştirakı ilə «Seçki – 2020» Müstəqil Media Mərkəzinın açılışı olub.
Bu barədə AZƏRTAC xəbər yayıb.
Buna da bax: Deputatlığa namizədlərin sayı 1000-i keçib
Qeyd edilib ki, «Seçki-2020» Müstəqil Media Mərkəzi seçkilərin geniş və obyektiv işıqlandırılması, habelə seçkilərdə şəffaflığın daha yüksək səviyyədə təmin edilməsi üçün kütləvi informasiya vasitələri (KİV) nümayəndələrinə yardım göstərilməsi məqsədilə yaradılıb.
Milli Məclisə seçkilər dövründə fasiləsiz fəaliyyət göstərməli olan Müstəqil Media Mərkəzində mətbuat konfransları keçirmək və bəyanatlar vermək üçün şərait yaradıldığı vurğulanıb.
Buna da bax: İmza toplanmasında olanlar, olmayanlar...
Xatırlatma
Bu il fevralın 9-da Azərbaycanda növbədənkənar parlament seçkiləri keçiriləcək. Ötən il dekabrın 2-də Milli Məclis hakim Yeni Azərbaycan Partiyasından olan (YAP) deputatların müraciətinə əsasən parlamentin buraxılması və növbədənkənar seçkilərin təyin olunması xahişi ilə prezidentə müraciət edib. YAP bunu prezident İlham Əliyevin islahatlar kursuna dəstək məqsədilə verdiyini açıqlayıb. Prezident də öz növbəsində bununla bağlı sərəncam verib. Əslində isə Azərbaycanda parlament seçkiləri bu ilin noyabrında keçirilməli idi.
Müxalifət qüvvələrindən Milli Şura bu seçkiləri boykot etməklə bağlı qərarını açıqlayıb. Qurum hesab edir ki, Azərbaycanda azad və ədalətli seçkilərdən ötrü minimum şərait belə yoxdur. Rəsmilər və Mərkəzi Seçki Komissiyasının rəhbərliyi onların fikirlərini qəbul etmirlər.