Azərbaycan Xalq Cəbhəsi Partiyasının (AXCP) Rəyasət Heyətinin üzvü, Qarabağ əlili Asif Yusifli iyulun 16-da saxlandıqdan dərhal sonra onun yaxınları vəkil Nemət Kərimli ilə müqavilə bağlasa da, bu müdafiəçi onunla bağlı istintaq prosesinə buraxılmayıb. A.Yusifli bununla əlaqədar müdafiə hüququnun pozuntusundan məhkəməyə şikayət edib.

Avqustun 5-də Nəsimi rayon Məhkəməsində A.Yusiflinin şikayətinə baxılıb. O, şikayətində yazıb ki, özünün etibar etdiyi vəkil olduğu halda, şübhəli və təqsirləndirilən şəxs kimi dindirilərkən onu yox, dövlət hesabına təyin edilmiş bir müdafiəçini çağırıblar. Baş Prokurorluğun İstintaq İdarəsinin müstəntiqi onun vəkilinin orderini qəbul etməyib, poçtla göndərməsini istəyib.

Buna da bax: Asif Yusifli istintaq təcridxanasına köçürülməyib

Bu üzdən A.Yusiflinin vəkili ancaq onun haqqında artıq həbs-qətimkan tədbiri seçilərkən məhkəmədə iştirak edə bilib. A.Yusifli müdafiə hüququnun pozuntusuyla bağlı şikayətinə özünün iştirakıyla baxılmasını istəyirdi. Bir həftə öncə elə onun iştirakının təmin edilməsi üçün məhkəmə prosesi təxirə salınmışdı. Amma avqustun 5-də də məhkəməyə A.Yusiflini gətirməyiblər.

Buna baxmayaraq, hakim Azər Tağıyev şikayətə baxıb. Qərar verib ki, A.Yusiflinin müdafiə hüququ pozulmayıb.

A.Yusiflinin ailə üzvləri AzadlıqRadiosu-na bildirib ki, qərardan apellyasiya şikayəti veriləcək. A.Yusifli iyulun 16-da saxlanılıb. O, iyulun 15-də Qarabağa dəstək yürüşündə baş verən hadisələrdə suçlanır. A.Yusifliyə qarşı CM-nin 186.2.1 (Özgənin əmlakını qəsdən məhv etmə və ya zədələmə), 233 (ictimai qaydanın pozulması) və 315 (hakimiyyət nümayəndəsinə qarşı müqavimət göstərmə və ya zor tətbiq etmə) maddələri ilə ittiham irəli sürülüb.

Buna da bax: Asif Yusifli: 'Heç bir qanunsuz hərəkət etməmişəm'

Amma o, məhkəmədə bildirib ki, həbsi qanunsuz və əsassızdır. Çünki həmin gün baş verən təxribatlarda iştirak etməyib – nə Milli Məclisin binasına daxil olub, nə də polis maşınının aşırılmasında rolu olub. Onun sözlərinə görə, kütlə ilə birlikdə Şəhidlər Xiyabanından sonra parlamentin qarşısındakı dayanacağın yanına gəlib, oradan da çıxıb evinə gəlib. Bir qrup şəxs Milli Məclisin binasına daxil olanda isə heç həmin ərazidə olmayıb.

Xatırlatma

Buna da bax: Gecə baş verənlərə görə cinayət işi açılıb

Bu il iyulun 14-də Bakda orduya dəstək yürüşünə qatılmış onlarla şəxs saxlanıb. AXCP-dən verilən məlumata görə, bu partiyanın 45 üzvü saxlanılıb. Onlardan 17 nəfərə Qarabağa dəstək yürüşü ilə bağlı Baş Prokurorluğun İstintaq İdarəsində başlanmış cinayət işi üzrə ittiham irəli sürülərək, bir nəfər istisna olmaqla, digərləri barəsində həbs-qətimkan tədbiri seçilib. Daha 18 nəfərə karantin rejimini pozma ittihamıyla 30 sutka inzibati həbs cəzası kəsilib. 10 nəfər isə sərbəst buraxılıb.

Baş prokurorluq və Daxili İşlər Nazirliyinin birgə açıqlamasında yürüş zamanı polis əməkdaşlarına xəsarət yetirildiyi, xidməti avtomobillərin aşırıldığı, Milli Məclisə ziyan dəydiyi qeyd olunub. Bu cinayət işi üzrə həbs olunanlara qarşı özgə əmlakına ziyan vurma, hakimiyyət nümayəndəsinə qarşı zor tətbiqetmə, ictimai asayişin pozulması ittihamları irəli sürülüb. AXCP-nin iki aparıcı üzvü – Məmməd İbrahim və Fuad Qəhrəmanlıya isə bunlardan əlavə, həm də hakimiyyəti zorla ələ keçirməyə cəhd ittihamı verilib. Partiya ittihamların saxta olduğunu, həbs olunan üzvlərindən bir neçəsinin həmin yürüşdə iştirak etmədiyini bəyan edib.