Türkmənistanın avtoritar lideri Qurbanquli Berdimuxamedov konstitusiyaya dəyişiklikləri imzalayıb. Sərt nəzarətdə olan bu ölkədə sənədin detalları tam bəlli deyil.
Dövlət mediası sentyabrın 25-də Xalq Şurası və deputatların təsdiqindən sonra Berdimuxamedovun dəyişiklikləri imzalaması barədə xəbər yayıb. Prezident özü bir il öncə bu təkliflə çıxış etmiş, layihəni hazırlayan komissiyaya da özü başçılıq edirdi.
Buna da bax: Türkmənistanda ərzaq qıtlığı onları da dilə gətirdi
Parlamentin strukturu dəyişir
Türkmənistan vətəndaşlarının dəyişikliklərin konkret mahiyyətindən xəbəri yoxdur. Bircə bilinən odur ki, təkpartiyalı parlament olan Məclis Xalq Şurası ilə birləşəcək və ikipalatalı qurum yaradılacaq.
Xalq Məsləhəti adlı şura 2017-ci ildə Ağsaqqallar Şurasının əsasında təsis olunub. Berdimuxamedov bu orqanın sədridir.
Tənqidçilərin sözlərinə görə, Berdimuxamedov dəyişikliklərdən istifadə edərək özünün ömürlük prezidentliyini, sonucda hakimiyyətin oğluna və nəvələrinə keçməsini təmin etmək istəyir.
Buna da bax: Berdymukhammedov indi də mənəviyyat haqqında kitab yazıb
Bu ayın əvvəlində onlarla türkmənistanlı Vaşinqtonda, Hyuston və Pitsburqda yürüşlərə çıxaraq plana etiraz ediblər
Hökumətin tənqidçiləri və insan haqları qrupları 2006-cı ildə avtokrat lider Saparmurat Niyazovun ölümündən sonra hakimiyyətə gəlmiş Berdimuxamedovun narazıları susdurduğunu, ölkədə çox az dəyişikliklər etdiyini deyirlər.
Berdimuxamedov da mərhum sələfi kimi hakimiyyətinin saxlanmasında əsas məhsul və xidmətlərin əhaliyə güzəştli qiymətə satılmasından yararlanıb.