Sentyabrın 27-dən Azərbaycan və Ermənistan silahlı qüvvələrinin təmas xəttində yenidən iri silahların işə düşdüyü bildirilir. Azərbaycan ordusu Ağdam, Tərtər, Füzuli-Cəbrayıl və Murov istiqamətində əks əməliyyatlara başladığını açıqlayıb. Ölkə başçısı və ordu rəhbərliyi bunu Ermənistan silahlı qüvvələrinin artıq mülki əhalini də atəşə tutması ilə izah edib. Qarşı tərəf isə yenə Azərbaycanı günahlandırır.
Buna da bax: Putin deyib ki, Qarabağın statusu ‘gələcəyə’ qalır
Politoloq Elxan Şahinoğlu AzadlıqRadiosuna deyib ki, Azərbaycan ordusu sentyabrın 27-də böyük hərbi uğurlar qazanıb: "27 il idi gözləyirdik ki, torpaqlar işğaldan azad edilsin. Uzun illər danışıqlar getdi, sonunda Azərbaycan cəmiyyəti də, siyasi elitası da bu qərara gəldi ki, danışıqlar fayda verməyəcək. Ermənistanda hakimiyyətə kim gəlirsə gəlsin, öz istəyi ilə torpaqları boşaltmayacaq".
E.Şahinoğlu
"Şuşada "inauqurasiya" keçirənlər"
E.Şahinoğlu deyib ki, sərhəddə təxribatlar, Şuşada "inauqurasiya" keçirənlər, "Dağlıq Qarabağ parlamenti"ni Şuşaya köçürmək istəyənlər Azərbaycanı hərbi əməliyyatlara vadar edib. Politoloq əlavə edib ki, son vaxtlar isə Ermənistan Livandan, Suriyadan ASALA, PKK terrorçularını, Rusiyanın "Vaqner" hərbi muzdlularını Qarabağa yerləşdirirdi.
Buna da bax: Partiyalar hərbi vəziyyəti belə dəyərləndirir
Amma E.Şahinoğlu bu məsələdə Rusiyanı yenə də əsas maneə adlandırır. O vurğulayıb ki, 2016-cı ilin aprel, 2020-ci ilin iyul əməliyyatları zamanı məhz Rusiyanın təzyiqləri nəticəsində əməliyyatlar dayandırılıb:
"Bu təzyiqlər yenə də olacaq"
"Bu təzyiqlər yenə də olacaq, buna tab gətirmək lazımdır. Türkiyə-Azərbaycan ittifaqı ona görə gücləndirilib ki, Türkiyə Rusiyanın təzyiqlərini balanslaşdıra bilsin. Elə sentyabrın 27-də Türkiyə və Rusiya xarici işlər nazirləri arasında telefon danışıqları da bunu göstərir".
S.Rüstəmxanlı
Deputat Sabir Rüstəmxanlı da "Turan" agentliyinə deyib ki, əməliyyatın ilk günü Azərbaycan Ordusu üçün uğurlu olub:
"Azərbaycan ordusu göstərdi ki,..."
"Azərbaycan ordusu göstərdi ki, hər cür təxribatı darmadağın etməyə hazırdır".
S.Rüstəmxanlı hesab edir ki, birinci hücum edən Ermənistandır: "Buna görə də dünya ona "dayan" deməlidir. Cəzasızlıq ora gətirib ki, Ermənistan dünyaya meydan oxudur...".
Buna da bax: Komendant saatı haqda nə düşünürsüz? - Bakıda sorğu
Politoloq Qabil Hüseynlinin isə qeyd etməsinə görə, bu aydın idi ki, Ermənistandan Dağlıq Qarabağa qoşun, muzdlu, hərbi texnika daşınırdı: "Burada "güc ordusu" formalaşdırmaq istəyirdilər. Bu səbəbdən də müharibə, yeni ərazilərin işğalı ritorikası güclənmişdi. Azərbaycan əhalisinə psixoloji təzyiq göstərilməyə başlandı...".
Onun fikrincə, əks əməliyyata başlanması da bu səbəblərdən irəli gəldi.
Politoloqun vurğulamasına görə, yeni güclər oyuna daxil olmağa çalışır və Rusiya müəyyən hərəkətlər etməyə çalışacaq:
Q.Hüseynli
"Türkiyə hökuməti Azərbaycana hər cür dəstəyin verilməsini xüsusi vurğulayır. Qüvvələr nisbətində böyük dəyişiklik var. Ordunun yüksək döyüş ruhu var. Sentyabrın 28-də belə davam etsə, Ermənistan ordusunun "nəfəsi kəsilə bilər"".
Xatırlatma
Qarabağ münaqişəsi Ermənistanın Azərbaycana ərazi iddiaları ilə 1988-ci ildə başlayıb. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilib. Atəşkəs razılaşması olsa da, onun tez-tez pozulduğu bildirilir. Xüsusilə 2016-cı ilin apreli və bu ilin iyulunda cəbhədə yenidən ağır silahların işə düşdüyü, hər iki tərəfin itkilər verdiyi açıqlanmışdı.
Dağlıq Qarabağ münaqişəsinin həlli ilə bağlı sülh danışıqları ATƏT-in Minsk qrupu həmsədrlərinin vasitəçiliyi ilə aparılır. ABŞ, Rusiya və Fransa həmsədr dövlətlərdir.