BMT-nin hesablamasına görə, gələn il Covid-19 pandemiyası və münaqişələrin artması səbəbindən köməyə ehtiyacı olan əfqanların sayı 5 milyon nəfər artacaq.
Ehtiyac yüksəlir və “təcili maliyyə lazımdır”, – Baş katibin Humanitar Məsələlər üzrə köməkçisinin vəzifəsini icra edən Rameş Racasingam dekabrın 15-də mətbuat konfransında deyib.
Əfqanıstandan səfərdən qayıtmış Racasingamın sözlərinə görə, bu ölkədə adətən sərt keçən qış vəziyyəti daha da ağırlaşdıracaq.
O, humanitar yardıma ehtiyacın artmasını “Covid-19 böhranının, münaqişələrin və məcburi köçkünlərin çoxalmasının” nəticəsi adlandırıb.
“2020-ci ildə 11 milyon nəfər üçün dəstək istəmişdik, gələn il onların sayı 16 milyona çatacaq”, – Racasingam vurğulayıb.
Əfqanıstan Prezidenti Aşraf Qani dekabrın 15-də deyirdi ki, Taliban qruplaşması ilə sülh danışıqlarının Qətərdən Əfqanıstana keçiriləcəyinə ümid edir. Onun sözlərinə görə, danışıqların Dohada dəbdəbəli otellərdə keçirilməsi əfqan xalqına təhqirdir.