Bakı növbəti "Formula 1"ə hazırlaşır. Bu il "Formula 1" üzrə Azərbaycan Qran Prisi koronavirus pandemiyasına görə azarkeşsiz keçiriləcək.
Bu barədə Bakı Şəhər Halqası Əməliyyat Şirkətinin bu gün, martın 2-də keçirilən seminarında bildirilib. Azərbaycanda kütləvi tədbirlərə qadağa qoyulduğundan belə bir qərar alınıb. Yarışların 4-6 iyun tarixində keçirilməsi nəzərdə tutulur.
Ölkədə "Formula 1" yarışları 2016-cı ildən keçirilir. 2019-cu ildə bunun 2023-cü ilə qədər uzadılmasına dair razılıq əldə edilib. O vaxt Gənclər və İdman naziri Azad Rəhimov "Formula 1"in Azərbaycanda turizmin inkişafına önəmli təsiri olacağını bildirmişdi. Verilən məlumatlara görə, ötənilki Qran Pri baş tutmadığı üçün yeni 3 illik müqavilə üzrə öhdəlik 2023-cü ilədək deyil, 2024-cü ilədək yerinə yetirilməlidir.
Azərbaycan rəsmiləri "Formula 1"in təşkilinə nə qədər pul sərf edildiyini tam olaraq açıqlamır. Müxalifət hesab edir ki, bu yarışların təşkilinə xərclənən böyük pullar əhalinin sosial müdafiəsinə yönəldilməlidir.