Rusiyanın Başqırdıstan Respublikasında qanunsuz qızıl çıxarmanı araşdıran ekologiya fəalı Baymak şəhərində naməlum şəxslər tərəfindən bərk döyüldüyünü deyir.
İldar Yumagulov aprelin 18-də günorta polis şöbəsinin 200 metrliyində üç nəfər tərəfindən döyülüb, iki qıçı sındırılmış vəziyyətdə xəstəxanaya yerləşdirilib.
Fəalın AzadAvropa/AzadlıqRadiosu-na deməsinə görə, qara paltarlı iki maskalı şəxs ona beysbol çubuğu ilə hücum ediblər. Onlardan qaça bilib, bu zaman üçüncü maskalı şəxs peyda olaraq onu yerə yıxıb və döyüblər.
“Onlar beysbol çubuğuyla ayaqlarıma vururdular. Qıçımın birini sındırıblar, sabaha əməliyyat planlaşdırılır”, – deyən Yumagulov hücum edənlər bircə kəlmə də danışmadıqlarını vurğulayıb.
Buna da bax: Ukraynaya görə liderləri görüşdürmək istəyirlər
Məqsəd “fəalları qorxutmaqdır”
Başqırdıstanın Daxili İşlər Nazirliyi hələlik, hücumlar bağlı şərh verməyib.
Yumagulov hücumu özünün Uraldakı qızıl mədənləri ilə bağlı fəaliyyəti ilə əlaqələndirir. Ekologiya fəalları və həmkarları qızıl çıxaran şirkətlərin ekoloji təhlükəsizlik qaydalarını pozduğunu deyirlər.
Həmkarı İlsir İrnazarov radioya deyib ki, naməlum şəxslər hücumdan bir neçə həftə öncə Yumagulov və maşınını izləməkdə şübhəli biliniblər.
Buna da bax: Tanınmış bloqeri döyüb xəstəxanalıq ediblər
“Əminik ki, hücum İldar Yumagulovun ictimai fəaliyyəti, vətəndaş mövqeyi ilə bağlıdır... Məqsəd İldarı və digər ekologiya fəallarını Uralda, ümumilikdə respublikamızda fəaliyyətdən çəkindirmək, qorxutmaqdır”, – İrnazarov söyləyb.
Yumagulov Başqırdıstanda qızılın nəzarətsiz çıxarılmasına qarşı fəaliyyət göstərirdi.
Son həftələr o, Baymak regionunda mədən işlətməyi planlaşdıran şirkətin mümkün planlarını öyrənməyə çalışırdı.