BMT Azərbaycanın işğal olunmuş əraziləri ilə bağlı məruzə yayıb

Ermənistan hesab edir ki, BMT sənədinin «hüquqi nəticələri» ola bilməz

BMT-də Azərbaycan Xarici İşlər Nazirliyi (XİN) tərəfindən hazırlanmış «Azərbaycan ərazilərinin hərbi işğalı: hüquqi qiymət» adlı məruzə yayılıb. XİN-in mətbuat xidmətindən verilən məlumata görə, sənəddə Ermənistan-Azərbaycan münaqişəsinin tarixi, Dağlıq Qarabağın və Azərbaycanın ona bitişik yeddi rayonunun Ermənistan tərəfindən işğalı haqqında ətraflı informasiya var.


«Ermənistan Azərbaycanın ərazilərini zəbt edib və bu ərazilərin özünə birləşdirilməsi üçün orada etnik təmizləmə aparıb»-, deyə məruzədə qeyd edilib.


«Turan» xəbər yayıb ki, bu məruzənin təqdimatını şərh edən Ermənistan XİN-in mətbuat katibi Vladimir Karapetyan deyib ki, sənədin «hüquqi nəticələri» ola bilməz. «Belə təşəbbüslə çıxış etmək hər bir dövlətin haqqıdır. Bu təşəbbüsün hər-hansı hüquqi nəticəsi ola bilməz», - deyə o, bildirib.