Bunu «Azadlıq» radiosuna İşgəncələr Əleyhinə Komitənin rəhbəri Elçin Behbudov deyib. O bildirir ki, sabiq nazir aclığa başlasa da, bu barədə həbsxana rəhbərliyini xəbərdar etməyib:
«Mən saxlanma kamerasında Fərhad Əliyevlə görüşdüm. Fərhad Əliyevin özünün bildirdiyi kimi, ürəyində ağrılar var. O mənə bildirdi ki, artıq bu gün (fevralın 2-si – red.) səhər saat 8-dən 48 saat müddətinə aclıq aksiyası keçirir».
Elçin Behbudov deyir ki, o, Fərhad Əliyevin müalicə müəssisəsinə köçürülməsi üçün MTN rəhbərliyinə müraciət edəcək. Hüquq müdafiəçisi nazirlikdən həm də xahiş edəcək ki, təcridxanaya növbəti monitorinqə gedərkən, KİV nümayəndələrinin də iştirakına icazə verilsin.
Fərhad Əliyev məhkəmənin qərarı ilə 10 il müddətinə azadlıqdan məhrum olunub. 2005-ci ilin oktyabrında dövlət çevrilişinə cəhd ittihamı ilə həbsə alınan sabiq nazir sonradan müxtəlif iqtisadi cinayətlərdə təqsirli bilinib. O, Milli Təhlükəsizlik Nazirliyinin (MTN) İstintaq Təcridxanasında saxlanır.