Avropa İttifaqı karantinin ardınca xarici sərhədlərini açmağa hazırlaşsa da, ABŞ, Braziliya və Rusiya vətəndaşları qitənin ərazisinə buraxılmaya bilər.
Bu barədə Reuters agentliyi Avropa Komissiyasının xüsusi qərarının qaralama variantına əsasən yazır.
Sənəddə deyilir ki, Avropa İttifaqı ərazisinə giriş, yalnız qonağın gəldiyi ölkədə əhalinin hər 100 min nəfərinə düşən koronavirus yoluxmalarının faizinə görə veriləcək.
Xəbər verilir ki, bu prinsiplə vətəndaşlarının Avropaya gəlişi qadağan olunacaq ölkələrin təxmini siyahısı tərtib edilib.
Buna da bax: Səhiyyə rəsmiləri yoluxmalarla bağlı xəbərdarlıq edir
Kriteriya
Avropa İttifaqında hər 100 min nəfərə hazırda 16 yoluxma düşür. Tövsiyələrə görə Avropa İttifaqına son 14 gün ərzində 100 min adama 16-20 yoluxması olan ölkələrin vətəndaşları buraxılacaq.
Hazırda bu rəqəm Braziliyada 190, ABŞ-da 107, Rusiyada isə 80 nəfərdir.
Reuters agentliyinin Avropanın diplomatik dairələrinə istinadən verdiyi xəbərdə deyilir ki, hansı ölkələrin vətəndaşlarına giriş məhdudiyyətlərinin tətbiq olunacağına dair yekun qərar hələki yoxdur.
Bəlli olan budur ki, bu və ya digər ölkənin vətəndaşları barədə qərar qəbul edilərkən həmin ölkədəki koronavirus statistikasının mötəbərliyi də nəzərə alınacaq. Bu, ilk növbədə həmin ölkədə aparılmış koronavirus testlərinin sayı ilə müəyyən ediləcək.
Sizin brauzer HTML5-i dəstəkləmir
Azərbaycan üçün şengen vizası sadələşə bilər
Hələki ABŞ da Avropa üçün açıq deyil
Sözü gedən sənədə əsasən Avropa Komissiyası iyulun 1-dən ittifaq ərazisinə müəyyən kateqoriya əcnəbilərin buraxılmasına icazə verəcək.
Söhbət ilk növbədə tələbələrdən, yüksək ixtisaslı mütəxəssislərdən gedir. Turistlərin qəbulu barədə qərar daha sonrakı mərhələdə veriləcək.
Avropa İttifaqının sərhədləri iyulun 1-dən habelə ittifaq üzvü olmayan bəzi Balkan ölkələrinin vətəndaşları üçün də açıq olacaq.
Digər bir şərt isə sözü gedən ölkələrin sərhədlərinin də Avropa İttifaqı vətəndaşları üçün açıq olmasıdır.
Bu xəbərlərlə bağlı hələlik Ağ Evdən və ya Kremldən heç bir şərh verilməyib.
ABŞ prezidenti Donald Trump hələ martın 11-də öz ölkəsinə Şengen zonasından olan bütün şəxslərin girişini qadağan edib.
Bu da xəbər verilir ki, hər il 10 milyondan çox avropalı ABŞ-a səfər edir.