Bakıda silahlı toqquşmada üçü polis olmaqla beş şəxs öldürülüb.
Bununla bağlı iyunun 24-də Daxili İşlər Nazirliyi və Baş Prokurorluq birgə məlumat yayıb.
Onların məlumatına görə, iyunun 24-də paytaxtın Xəzər rayonu Şüvəlan qəsəbəsində axtarışda olan 1986-cı təvəllüdlü Rövşən Allahverdiyevi polis saxlayarkən o, silahlı müqavimət göstərib.
Rəsmi açıqlamada iddia olunduğuna görə, o, polis əməkdaşlarına mane olmaq məqsədilə ailə üzvlərini önə verərək yayınmağa və cavab tədbirlərinin qarşısını almağa cəhd edib: "..."Lancaster" markalı ov silahından atəş açaraq üç nəfər polis əməkdaşını və bir nəfər mülki vətəndaşı qətlə yetirib".
Davam etdirilən tədbirlərlə R.Allahverdiyevin də öldürüldüyü bildirilir.
Hələlik, rəsmi açıqlamaya R.Allahverdiyevin yaxınları və vəkilinin münasibəti bəlli deyil.
Onun nəyə görə axtarışa verildiyini öyrənmək mümkün olmayıb.