Noyabrın 19-da Almaniya kansleri Olaf Şolts Rusiyanın Ukraynadakı savaşa görə məsuliyyət daşıdığını birbaşa bildirməyən G20-nin ("Böyük 20"lik ölkələrinin) yekun Rio-de-Janeyro bəyannaməsini tənqid edib.
Şoltsun fikrincə, min gün boyunca havadan zərbələrə məruz qalan ukraynalılar Putinin "böyüklük maniyasından və əraziləri güclə genişləndirmək istəyindən əziyyət çəkirlər". Sənəddə Rusiyanın məsuliyyəti ilə bağlı ifadələrin yetərsiz olduğunu deyən kansler orada başqa sözlər görmək istədiyini bildirib.
Ukrayna prezidenti Volodimir Zelenski də G20 liderlərini qınayıb. Onun fikrincə, həmin liderlər Putinin nüvə silahından istifadə hallarını genişləndirən fərmanı ilə bağlı heç bir addım atmayıblar.
Almaniya kansleri ilə razılaşan Zelenski, eyni zamanda, rəsmi Berlinin ölkəsinə Rusiya ərazisinin dərinliklərinə zərbələr endirmək üçün uzaqmənzilli "Taurus" raket sistemləri verməmək mövqeyini tənqid edib. O, ABŞ-ın zərbələrlə bağlı qərarından sonra bu məsələdə Almaniyanın da dəstək vaxtının yetişdiyini deyib.
Ölkəsinin Avropada Ukraynanın ən böyük dəstəkləyicisi olduğunu bildirən Şoltsun fikrincə, yanlış addım olmaqla yanaşı, bu qərar Almaniya ilə Rusiya arasında birbaşa münaqişəni daha da yaxınlaşdıracaq.
ABŞ mediasının çoxsaylı xəbərlərinə görə, Kiyevin bir neçə ay sürən xahişlərindən sonra Ukraynaya ATACMS raketləri ilə Rusiya ərazisinin dərinliklərinə zərbə endirməyə icazə verilib. Ağ ev yayılan bilgiləri təsdiqləməsə də, onları təkzib də etməyib.