Sentyabrın 21-də axşam İranın şərqində kömür mədənində partlayışda azı 51 nəfər həlak olub, 20 nəfər xəsarət alıb.
Hadisə paytaxt Tehrandan 540 km cənub-şərqdə yerləşən Təbasda baş verib. 24 şaxtaçının içəridə qaldığı güman edilir.
Partlayış vaxtı mədəndə 70-dək adamın işlədiyi bildirilir.
Nyu-Yorka BMT Baş Assambleyasına getməyə hazırlaşan prezident Məsud Pezeşkian deyib ki, mədəndə qalanları qurtarmaq və onların ailələrinə yardım üçün bütün qüvvələri səfərbər etmək göstərişi verib. O, insidentin araşdırılmasına başlandığını söyləyib.
Dövlət mediasının yazdığına görə, şaxtanın B və C bloklarında metan qazı partlayışı baş verib.
Bu, İranın mədən sənayesində ilk partlayış deyil.
Ötən il şimaldakı Damğan şəhərində mədən partlayışında altı nəfər həlak olub.
2021-ci ilin mayında isə həmin ərazidə uçqunda iki mədənçi ölüb.
2017-ci ildə İranın şimalında Azadşəhr şəhərində partlayışda 43 şaxtaçı həlak olub.
Adətən, qəzalara təhlükəsizlik standartlarında boşluqlar, fövqəladə xidmətlərin qeyri-adekvatlığı səbəb göstərilir.