İsrail Qəzzada quru əməliyyatını gücləndirir

Oktyabrın 30-na keçən gecə İsrail Qəzzada quru əməliyyatlarını davam etdirib, binalarda və tunellərdə barrikadalar quran onlarla HƏMAS silahlısı öldürülüb. Məlumatı İsrailin Müdafiə Qüvvələri (İMQ) bu gün – oktyabrın 30-da yayıb.

İMQ son bir neçə gündə 600-dən artıq "terror" hədəflərinin vurulduğunu bildirib. Buraya silah depoları, onlarla tank əleyhinə raketburaxma mövqeləri, eləcə də HƏMAS-ın istifadə etdiyi gizli sığınacaqlar və platsdarmlar daxildir.

"İkinci mərhələ"

İsrail ötən həftə HƏMAS-a qarşı müharibənin ikinci mərhələsinin başlandığını bildirib. Bazar günü – oktyabrın 29-da isə Qəzzaya quru əməliyyatının intensivləşdiyi açıqlanıb. Bundan öncə HƏMAS-ın nəzarət etdiyi ərazilər həftələrlə havadan zərbələrə məruz qalıb.

Buna da bax: Mahaçqala aeroportunda iğtişaşda azı 20 nəfər xəsarət alıb

Ölkə "uzun və çətin" müharibəyə hazırdır, İsrailin baş naziri Binyamin Netanyahu deyib. HƏMAS-ın oktyabrın 7-də İsrailə hücumu nəticəsində, əsasən, dinc sakinlər olmaqla azı 1400 nəfər öldürülüb.

İsrailin bu hücuma cavab olaraq başlatdığı zərbələrdə ölənlərin sayı isə 8 minə yaxınlaşır. Bu məlumatı oktyabrın 29-da Rəmallahdakı Fələstin Səhiyyə Nazirliyi açıqlayıb. Qurum azı 20 min nəfərin xəsarət aldığını bildirib. Öldürülənlərin 73 faizinin əhalinin həssas qruplarından, o cümlədən uşaqlar, qadınlar və yaşlılar olduğu xəbər verilir.

"Reuters" bu rəqəmləri dəqiqləşdirə bilməyib.

Xəstəxanalarla bağlı iddialar

İsrailin hava zərbələrinin Qəzzadakı Əl-Şifa və Əl-Qüds xəstəxanaları yaxınlığına düşdüyü, fələstinli silahlıların Xan Yunis şəhərinin şərq hissəsində İsrail qüvvələri ilə toqquşduğu bildirilir.

Fələstin Qırmızı Xaç Komitəsi bazar günü bildirib ki, 14 minədək insanın sığındığı Əl-Qüds xəstəxanasının dərhal boşaldılması barədə İsrail hakimiyyətindən xəbərdarlıq alıb.

Buna da bax: 'Bizim savaşımız deyil': İranlılar İsrail-HƏMAS savaşında Fələstin məsələsinə az dəstək verirlər

İsrail HƏMAS-ı Qəzzadakı xəstəxanalarda komandanlıq mərkəzlərini, digər hərbi infrastrukturu yerləşdirməkdə ittiham edir. Radikal qruplaşma isə bunu rədd edir.

Fələstin rəsmiləri Əl-Şifa xəstəxanasına 50 minədək insanın sığındığını, İsrailin bu əraziyə təhdidindən narahat olduqlarını deyiblər.

HƏMAS 7 oktyabr hücumu zamanı azı 239 nəfəri girov götürüb.

İsrail ordusu Qərb sahildə islamçı qruplara qarşı əməliyyatları da intensivləşdirib. Onlarla fələstinli öldürülüb, yüzlərlə həbs olunan var.