"Xankəndidə hələ Azərbaycan polisi olmayacaq... Bəzi məntəqələrə birgə nəzarət olacaq"
Bu sözləri Azadlıq Radiosunun İzahla buraxılışının qonağı olan Beynəlxalq Münasibətlərin Təhlili Mərkəzinin sədri Fərid Şəfiyev deyib.
Fərid Şəfiyev İzahla proqramının buraxılışında jurnalist Ülviyyə Əsədzadə ilə Qarabağdakı son durumu müzakirə edib.
Şəfiyevin sözlərinə görə, Azərbaycan höküməti Qarabağ erməniləri ilə bağlı sosial-iqtisadi paket açıqlayacaq. Təhlilçi eyni zamanda kimlərin Azərbaycan vətəndaşlığına qəbul ediləcəyi ilə bağlı şərtlərin də müəyyənləşəcəyini deyir:
- Azərbaycan polisi Xankəndi şəhərində fəaliyyət göstərməyəcək? Orda Rusiya sülhməramlıları olacaq eləmi?
-Xankəndi şəhərində bəli.
-O zaman dəyişən nədir? Sadəcə erməni qüvvələri buraxılmış olacaq?
-Bəli. Buraxılmış olacaq və bir çox ərazilər bizim nəzarətimizdə olacaq.
-Yəni, hansı ərazilərə Azərbaycan nəzarət edəcək?
-Onu siz görəcəksiz bu günlərdə. Bəyan olunacaq ki, hansı məntəqələrə nəzarət olunacaq, hansı məntəqələrə birgə nəzarət olunacaq və s.
-Yəni, qarışıq model olacaq? Bir hissə Rusiya sülhməramlıları, bir hissə Azərbaycan...
- Bəli. Bu, bizim öhdəliyimizdir. 2025-ci ilə qədər Rusiya sülhməramlıları orda olacaqlar. Bizimçün ittihamlar var ki, soyqırım ola bilər və s. Bu da müəyyən dərəcədə təminatdır.
Fərid Şəfiyev amnistiya ilə bağlı şərtlərin açıqlanacağını da qeyd edib.
Son günlər baş verənlər
- Sentyabrın 19-da rəsmi Bakı "lokal antiterror tədbirləri"nə başladığını elan edərək erməni silahlı qüvvələrinin regiondan çıxarılmasını tələb edib.
- Sentyabrın 20-də hərbi əməliyyatların dayandırılması barədə razılıq əldə olunduğu açıqlandı. Açıqlamaya görə, razılığa əsasən, Ermənistan silahlı qüvvələrinin birləşmələri Azərbaycan ərazilərini tərk edir, qeyri-qanuni erməni silahlı dəstələri buraxılır.
Sizin brauzer HTML5-i dəstəkləmir
Qərbdən gələn tənqidlərin təsiri nə ola bilər?
Xatırlatma
- 2020-ci il sentyabrın 27-də Azərbaycan və Ermənistan silahlı qüvvələrinin təmas xəttində ağır döyüşlər başlamışdı. 44 günlük bu müharibə, sonrakı razılaşma nəticəsində Azərbaycan Dağlıq Qarabağın bir hissəsinə (Xocavənd rayonu daxil) və ətraf 7 rayona nəzarəti bərpa edib. Həmin ilin 10 noyabr razılaşmasına (Azərbaycan, Ermənistan və Rusiya rəhbərləri arasında) əsasən, Laçın dəhlizində və qoşunların təmas xəttində Rusiya sülhməramlıları yerləşdirilib.
- Qarabağ münaqişəsi 1988-ci ildə başlayıb. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi.