İyunun 14-də İsrailin yeni baş naziri Naftali Bennet vəzifəsinin icrasına başlayıb. Parlament bir gün öncə cüzi fərqlə onun hökumətini təsdiqləyib və Bencamin Netanyahunun 12 il qaldığı vəzifədən gedib.
Bennet iyunun 13-də axşam baş nazir andı içib, bu gün səhər hökumətinin 27 üzvünü Yerusəlimdə Prezident Reuven Rivlinə təqdim edib.
Kabinet üzvləri daha sonra yeni nazirlik təyinatları aparıb, heyətlə görüşüblər.
Buna da bax: Paşinyan minaların xəritəsindən danışdı
Geniş alyans
49 yaşlı texnologiya milyonçusu və xüsusi qüvvələrin keçmiş komandiri Bennet ultramillətçi Yamina partiyasına başçılıq edir.
Mərkəzçi Yeş Atid partiyasının lideri Yair Lapid Bennetlə alyans yaratmağa razılaşıb. Alyansa sağ qanad, sol qanad, mərkəzçi və ərəb partiyaları daxildir.
Hakimiyyət bölgüsü sazişinə görə, Bennet 2023-cü ilin sentyabrınadək baş nazir olacaq. O, daha sonra hakimiyyəti iki il müddətinə Lapidə təhvil verməlidir.
Bennet and içəndən sonra ABŞ Prezidenti Co Bayden deyib ki, ölkəsi “İsrailin təhlükəsizliyini tərəddüdsüz dəstəkləyir” və Vaşinqton Bennet hökuməti ilə işləməyə “tam sadiqdir”.
Digər ölkə liderləri Benneti İsrailin 13-cü baş naziri olması münasibətilə təbrik ediblər. Bu sırada Britaniyanın Baş naziri Boris Conson, Hindistanın Baş naziri Narendra Modi, Rusiya Prezidenti Vladimir Putin var.
Buna da bax: Abbas Lisani və daha 4 nəfər aclıq edir
İranın mövqeyi
İsrailin əzəli düşməni İran isə yeni hökumətin ölkənin xarici və təhlükəsizlik siyasətinə dəyişiklik gətirməyəcəyini bildirib.
“İranın düşmənləri gedirlər, güclü İran isə yerində qalır. Düşünmürəm ki, yeni hökumət İsrailin siyasətinə dəyişiklik etsin”, – Xarici İşlər Nazirliyinin sözçüsü Səid Xətibzadə iyunun 14-də deyib.
71 yaşlı Netanyahu son iki ildə dördüncü – 23 mart seçkisindən sonra yeni hökumət formalaşdıra bilməyib. O, Likud partiyasının lideri olaraq qalır.
Netanyahunun köməkçisi Topaz Luk iyunun 14-də deyib ki, keçmiş baş nazir müxalifət lideri kimi “bu təhlükəli və dəhşətli hökumətlə mübarizə aparacaq”.
“O bu təhlükəli hökuməti mümkün qədər tez devirmək üçün motivasiya ilə doludur”, – Luk Netanyahu haqda deyib.