Azərbaycanın Livandakı səfirliyi qarşısında aksiya keçirilib, binaya içərisində boya olan və partlayıcı bərkidilmiş şüşələr atılıb. Bu barədə Azərbaycan Xarici İşlər Nazirliyi (XİN) məlumat yayıb.
XİN-in rəsmi açıqlamasında aksiya keçirənlər "50-yə yaxın erməni əsilli şəxslər" kimi təqdim edilir. Onlar aksiyada "Artsax (Qarabağ) Ermənistandır", "Azərbaycan təcavüzünə son" və başqa şüarlar səsləndiriblər.
Məlumatda bildirilir ki, hücum nəticəsində səfirliyin heyəti xəsarət almayıb.
"Hadisə barədə diplomatik nümayəndəliklərin mühafizəsinə cavabdeh olan quruma məlumat verilən kimi hüquq-mühafizə orqanları hadisə yerinə gəlsələr də, həmin vaxt təxribatçılar ərazidən uzaqlaşmağa müvəffəq olublar", - XİN vurğulayır.
Açıqlamaya görə, olayları törədənlərin aşkarlanması və həbs edilməsi məqsədilə Livanın Xarici İşlər Nazirliyinə müvafiq nota təqdim edilib və aidiyyəti üzrə tədbirlər həyata keçirilir.
Bu açıqlamaya, hələlik, aksiya iştirakçıların münasibəti bəlli deyil.
Son illər Azərbaycanın xaricdəki daha bir neçə səfirliklərinə də oxşar hücumlar olduğu bildirilib. Elə 2022-ci ilin sentyabrın 16-da Livandakı Azərbaycan səfirliyinə də hücum olduğu açıqlanmışdı.
Xatırlatma
Qarabağ münaqişəsi 1988-ci ildə Ermənistanın Azərbaycana ərazi iddiaları ilə başlayıb. Onların arasında müxtəlif illərdə döyüşlərə səbəb olub. 1994-cü il atəşkəs razılaşmasına qədər Azərbaycan Qarabağ bölgəsi və ətraf 7 rayona nəzarəti itirib. Amma 2020-ci ildə 44 günlük İkinci Qarabağ müharibəsi nəticəsində Azərbaycan Qarabağın bir hissəsinə və ətraf 7 rayona nəzarəti bərpa edib. Azərbaycan, Ermənistan və Rusiya rəhbərliyinin birgə razılaşması ilə Laçın dəhlizində və Qarabağdakı təmas xəttində Rusiya sülhməramlıları yerləşdirilib.