Dekabrın 11-də Fransada etirazlar yenə də davam edib. Küçələrə çıxan tələbələr fransa hökumətinin planlaşdırdığı iqtisadi islahatlara etiraz ediblər.
Bundan 1 gün öncə Fransa prezidenti Emanuel Macron televiziya ilə xalqa müraciətində bildirmişdi ki, hökumət minimal əməkhaqlarını 100 avro artıracaq. Bundan əlavə o bildirib ki, pensiyaçılara və kasıblara vergi güzəştləri tətbiq ediləcək. Amma Macron varlılara tətbiq olunan xüsusi vergini bərpa etməkdən və 2019-cu ildə davam etdirəcəyi iqtisadi islahatları dayandırmaqdan imtina edib.
Sizin brauzer HTML5-i dəstəkləmir
Fransada tələbələr də ayağa qalxdı
“Bu bizim ölkə üçün tarixi andır. Biz dialoq yolu ilə uğura və qarşılıqlı hörmətə nail olacağıq”, Macron deyib.
Amma bir çox fəallar onun dediklərinə şübhə ilə yanaşırlar.
"Bu haqda nə düşünürəm? Ümumi götürəndə heç nə. Deyərdim ki, bu çox dumanlı görsənir. 100 avro bir o qədər də böyük artım deyil. Əgər geri çəkilsək onda bu məbləğ 80 avroya bəlkə də ondan da aşağı düşəcək",Carl Tokar adlı fəal deyir.
Emmanuel Macronun verdiyi vədlər Fransa büdcəsinə milyardlarla avroya başa gələcək. Amma bu vədlərin “sari jiletləri”, etirazçıları sakitləşdirib-sakitləşdirməyəcəyi hələ bəlli deyil.
Fransada etirazlar noyabrın ortalarında-yeni ildən yanacağın qiymətinin artırılacağı barədə xəbərdən sonra başlayıb. “Sarı jilet” hərəkatı çərçivəsində paytaxt Paris və digər şəhərlərdə dükanlar qarət olunub, avtomobillər yandırılıb. Polislə qarşıdurmalarda yüzlərlə adam xəsarət alıb, 2000-dək adam saxlanıb.