Səudiyyədə hakimiyyət orqanları Bin Laden ailəsinə məxsus şirkətin 7 avtobusunun yanması ilə bağlı araşdırmaya başlayıb.
Yerli media xəbərlərində avtobuslara aylardır maaşlarını ala bilməyən fəhlələr tərəfindən od vurulduğu ehtimal edilir.
Şirkətə məxsus minik avtomobillərinin pəncərələri də sınıq-sınıq edilib.
Səudiyyə polisinin sözçüsü Nayaf Sharif yanğın basqının işçilərin yaşadıqları ərazidə baş verdiyini təsdiq edib. O hadisə zamanı heç kəsin xəsarət almadığını bildirib.
İşdən qovulanlar əcnəbi fəhlələrdir
Bundan əvvəl Səudiyyə mətbuatı yazırdı ki, ölkənin ən böyük şirkətlərindən biri olan Bin Laden Group iqtisadi böhranla bağlı 200 min işçisindən 50 minini ixtisar etməyi planlaşdırır.
Bu şirkətdə işçilər azı dörd aydır ki, maaşlarını ala bilmirlər.
Xəbər verilir ki, şirkətin əsas müştərisi olan hökumət maaşların verilməsini dayandırmış və layihələri ləğv etmişdi.
Ötən il Bin Laden şirkətinin kranı Böyük Məsçidin üstünə yıxılmışdı
Avtobusların yanmasından əvvəl şirkətin Riyaddakı inzibati binası qarşısında işçilərin etiraz aksiyası keçirilirdi.
Səudiyyənin əl-Vətən qəzeti yazır ki, işdən azad edilənlərin demək olar hamısı əcnəbi işçilərdir. Onların ölkədən çıxmasına birdəfəlik çıxış vizası verilsə də, işçilər getmək istəmirlər, çünki bu halda maaşlarını ümumiyyətlə ala bilməyəcklərindən ehtiyat edirlər.
Şirkətin ödənməyən maaşlar və müxtəlif məhkəmə çəkişmələri ilə bağlı borcunun 30 milyard dollara çatdığı xəbər verilir.
Üstəlik ötən il Bin Laden şirkətinə məxsus kranın aşaraq Məkkədə 107 nəfərin ölümünə səbəb olmasından sonra ona verilmiş tenderlər ləğv olunub.
Bin Laden qrupu əl-Qaedanın mərhum lideri Osama bin Ladenin atası Muhammad bin Laden tərəfindən təsis edilib.
Milyardlar qazanan şirkət milyardlarla borca düşüb
Bütün ərəb dünyasında ən böyük tikinti şirkətlərindən olan bu qrupun illik dövriyyəsinin 1 milyard dollar olduğu təxmin edilir.
Bu şirkət krallığın ən böyük tikinti layihələrini icra edib. Müqəddəs ocaqların yeniqurma işləri də bu şirkətə həvalə edilmişdi.
Şirkət bu yaxınlarda dünyanın ən hündür göydələni 1, 6 kilometrlik qüllənin ucaldılması üçün tenderin qalibi olmuşdu. Ciddədə tikiləcək bu binanın qiyməti 1, 23 milyard dollar olaraq dəyərləndirilir.
Bundan başqa şirkət Qətərin paytaxtı Dohada metro tikintisi üçün elan edilmiş tenderdə də qalib gəlmişdi.
Media xəbərlərinə görə Bin Laden qrupunun əsas kommersiya rəqibi Saudi Ojer şirkətinin də maliyyə vəziyyəti acınacaqlıdır.
Bu şirkət Livanın qətlə yetirilmiş baş naziri Rafik al-Hariri tərəfindən təsis edilmişdi.
Hazırda bu şirkətə onun oğlu başçılır edir. 56 min işçisinin aylardır maaşlarını ödəyə bilməyən şirkətin tezliklə müflis elan ediləcəyi gözlənilir.