Avropa Birliyinin dərman tənzimləyici orqanı ürək iltihabıyla Pfizer və Moderna şirkətlərinin COVID-19 vaksinləri arasında mümkün əlaqə aşkarladığını bildirir. Qurum nadir qan xəstəliyi olanlara da Johnson&Johnson's vaksinini vurdurmamağı tövsiyə edib.
mRNA texnologiyasına əsaslanan bu iki peyvəndin mümkün yan təsirləri sırasında ürəyin miokardit və perikardit xəstəlikləri göstərilir. Avropa Dərman Agentliyinin (EMA) təhlükəsizlik komitəsi açıqlamanı iyulun 9-da verib.
Buna da bax: İndoneziya virus ocağına çevrilib
“Qaçış sindromu”
EMA-nın bildirməsinə görə, gənc kişilər bu təsirlərə daha çox meyllidirlər. Yan təsirlər isə özünü ikinci doza vurulandan sonra iki həftə ərzində göstərir. Ötən ay ABŞ-ın səhiyyə rəsmiləri də oxşar qənaətə gəlmişdilər.
Qurum “qaçış sindromu” kimi tanınan “sistematik kapillyar qan sızıntısı” xəstəliyi (CLS) olanlara da Johnson&Johnson's vaksini vurdurmamağı tövsiyə edib. Ötən ay CLS AstraZeneca-nın Vaxzevria peyvəndinin də yan təsirləri siyahısına salınmışdı.
Qaçış sindromu xəstəliyi (Capillary leak syndrome) qanın laxtalanması, təzyiqin düşməsi ilə müşahidə edilir, damarlardan zülal, mineral və su sızır.
Buna da bax: Dəqiqədə 11 nəfər... acından ölür
Buster dozaya ehtiyac varmı
Həm AstraZeneca, həm də Johnson&Johnson vaksinlərində adenovirus texnologiyasından – soyuqdəymə virusunun müxtəlif versiyalarından istifadə olunur.
EMA onu da bildirib ki, mRNA vaksinlərinin iki dozasından əlavə dozaya ehtiyac olub-olmadığını müəyyənləşdirmək üçün hələ tezdir. Pfizer, almaniyalı tərəfdaşı BioNTech ilə birlikdə iyulun 8-də bildirib ki, buster dozasına icazə almaq üçün ABŞ və Avropa qurumlarına müraciət edəcəklər.
Pfizer niyyətini peyvənddən altı ay sonra yoluxma riskinin artması, üstəlik, yüksək yoluxucu delta ştammının yayılması ilə əsaslandırıb. EMA isə iyulun 9-da indilik iki dozanın yetərli olmasına inandığını deyib.