Fevralın 15-də Şimali Atlantika Müqaviləsi Təşkilatının (NATO) baş katibi Yens Stoltenberq Azərbaycan prezidenti İlham Əliyevə zəng edib.
Bu barədə Azərbaycan prezidentinin mətbuat xidməti məlumat yayıb.
Məlumata görə, telefon danışığı əsnasında Azərbaycan-NATO əlaqələrinin inkişafından məmnunluq ifadə olunub.
Habelə bildirildiyinə görə, Cənubi Qafqaz regionunda postmünaqişə (Qarabağ münaqişəsi nəzərdə tutulur) vəziyyəti, Ukrayna ətrafında cərəyan edən proseslərə və dünya enerji bazarındakı mövcud duruma dair fikir mübadiləsi aparılıb: "NATO-nun baş katibi Avropanın etibarlı qaz təchizatçı olmasına və qaz ixracını artırmasına görə Azərbaycana təşəkkürünü ifadə edib. Prezident İlham Əliyev Azərbaycanın enerji məhsulu növlərinin önəmli ixracatçısı kimi etibarlı tərəfdaş olaraq qalmaqda davam edəcəyini diqqətə çatdırıb".
Xatırlatma
Azərbaycan NATO ilə, əsasən, 1994-cü ildən əməkdaşlıq edir. O, 1994-cü ildən Alyansın "Sülh naminə tərəfdaşlıq", 2004-cü ildən isə "Fərdi tərəfdaşlıq" proqramlarına qoşulub.
Amma ölkə rəsmiləri son illər bildiriblər ki, qarşıya NATO-ya üzvlük məsələsi qoyulmayıb.