ABŞ dövlət katibi Mike Pompeo Rusiya xarici işlər naziri Sergei Lavrova deyib ki, Moskvanın Venesuelaya hərbi kontingent göndərməsi oradakı gərginliyi artırır və Vaşinqton buna “sakit baxa bilməyəcək”.
ABŞ Dövlət Departamentinin sözçüsü Robert Palladino deyib ki, martın 25-də Pompeo Lavrova zəng edib və ona region ölkələrinin Rusiyanın Venesuelada gərginlikləri qızışdırmasına biganə qala bilməyəcəklərini deyib”.
Pompeonun Lavrova zəngindən əvvəl Venesuela rəsmisi demişdi ki, Rusiya təyyarəsi ötən həftəsonu Karakasa enib və bu, iki ölkə arasında davam edən hərbi əməkdaşlığın bir hissəsidir.
İki Rusiya hərbi təyyarəsinin Venesuelaya gəlməsi hələlik müstəqil mənbələr tərəfindən təsdiq olunmur, lakin Rusiya prezidenti Vladimir Putinin Venesuelada hakimiyyətini qoruyub saxlamağa çalışan Maduroya dəstək verdiyi bəllidir.
Buna da bax: Venesuela paytaxtında yenə Rusiya təyyarələri peyda olubMike Pompeo təyyarələrlə bağlı iddialara dair deyib:
"Veneseuelada Nicolas Maduronun qanunsuz rejiminə dəstək verilməsi məqsədilə Rusiya hərbi heyətinin bu ölkəyə davamlı qaydada gətirilməsi keçid prezidenti Juan Guaido-nu çoxluqla dəstəkləyən Venesuala xalqının iztirablarını uzadır”.
Birləşmiş Ştatlar və onlarca başqa ölkə Venesuela müxalifətinin lideri Juan Guaido-nu dəstəkləyir. Guaido bildirir ki, Maduronun ötən il prezidentliyə təkrar seçilməsi saxtakalıq hesabına həyata keçirilib.
Bu arada Rusiyanın Xarici İşlər Nazirliyi bildirib ki, Lavrov Pompeo ilə telefon söhbətində “Vaşinqtonun Venesuelada dövlət çevrilişi etmək cəhdlərindən” gileylənib.
Rusiya XİN-in bu barədə bəyanatında deyilir ki, belə hərəkətlər “BMT Nizamnaməsinə ziddir və suveren dövlətin daxili işlərinə üstüörtülü qarışılması kimi qiymətləndirilməlidir”.