Moskvada Rusiya müxalifətinin qətlə yetirilmiş lideri Boris Nemtsovun xatirəsinə yürüş keçirilir.
Aksiya Moskva meriyası ilə razılaşdırılsa da, təşkilatçılar bir neçə nəfərin saxlandığını bildirirlər.
Azadlıq Radiosunun Rusiya xidməti saxlananlardan "Rus, oyan", "Rus, mübarizə apar" kimi şüarların alındığını yazır.
Liberal müxalifət partiyalarının təşkil etdikləri aksiyada Nemtsovun portretləri ilə yanaşı, onun sitatlarının yer aldığı şüarlar da qaldırılıb.
Aksiyanın önündə PARNAS Partiyasının lideri Mixail Kasyanov, "Həmrəylik" Hərəkatının rəhbəri İlya Yaşin gedirlər.
Yürüşə "Yabloko" Partiyasının sədri, prezidentliyə namizəd Qriqori Yavlinski də qatılıb.
Aksiyaya prezidentliyə namizəd Kseniya Sobçak da qoşulub.
Yürüşdə onminlərlə insan iştirak edir.
Aksiyanın sonunda yürüşçülər Nemtsovun 3 il qabaq öldürüldüyü Moskvoretsk körpüsünə gəlib oraya gül-çiçək düzməyi planlayırlar.
Analoji aksiyalar Sankt-Peterburq və bir sıra başqa şəhərlərdə də keçirilir.
Nemtsov 1990-cı ilərdə Rusiya hökumətində yüksək vəzifələr tutub, 2000-ci illərdə müxalifətə keçib. 2015-ci il, fevralın 27-də qətlə yetirilib.
Buna da bax: Vaşinqtonda Rusiya səfirliyinin ünvanı ‘Nemtsov Plaza 1’ olacaq