ATƏT Azərbaycanda aprelin 11-də keçiriləcək prezident seçkilərini müşahidə etmək üçün missiya göndərilməsini tövsiyə edib.
Bu haqda ATƏT-in Demokratik Təsisatlar və İnsan Haqları Bürosunun fevralın 21-22-də Bakıya səfərinin yekunları ilə bağlı hesabatında bildirilir.
12-səhifəlik hesabatda ölkədəki ictimai-siyasi durum, qanunvericiliyin vəziyyəti, onun tətbiqi təhlil edilir.
Hesabat hakimiyyət nümayəndələri, parlament üzvləri, siyasi partiyalar, vətəndaş cəmiyyəti və mətbuat təmsilçiləri ilə görüşlər və danışıqların əsasında yazılıb.
Hesabatın rəy və tövsiyələr bölməsində deyilir ki, missiyanın Bakıda müzakirə apardığı şəxslərin əksəriyyəti DTİHB-nin növbədənkənar seçkilərlə bağlı monitorinqinin önəmli olduğunu qeyd ediblər.
Sənəddə deyilir ki, dövlət qurumlarının nümayəndələri isə seçki prosesinin şəffaf və beynəlxalq demokratik seçki standartlarına uyğun keçiriləcəyini bildiriblər. Onlar ATƏT DTİHB-nin müşahidələrini və seçki prosesinin yaxşılaşdırılmasına dair istənilən potensial tövsiyələrini alqışlayıblar.
Sizin brauzer HTML5-i dəstəkləmir
Azad və ədalətli seçki necə olur?
DTİHB hesab edir ki, seçki qanunvericiliyinin reallaşması, seçki administrasiyasının effektivliyi və qərəzsizliyi, seçki kampaniyasının keçirilməsi, əsas azadlıqlara əməl olunması, seçkilərin KİV-də işıqlandırılması, səslərin hesablanması da daxil olmaqla, seçki prosedurunun idarə edilməsi kimi məsələlərə xüsusi diqqət yetirmək lazımdır.
DTİHB seçkiləri müşahidə etmək üçün missiya göndərilməsini tövsiyə edib. Qurum əsas ekspertlər qrupuna əlavə olaraq ATƏT ölkələrindən 30 uzunmüddətli və 280 qısamüddətli müşahidəçi istəyəcək. Onlar ölkə boyunca seçki prosesini və seçkilərin özünü müşahidə edəcəklər.
Xatırlatma
İ.Əliyev fevralın 5-də növbədənkənar prezident seçkilərinin keçirilməsi barədə qərar verib. Seçkilər bu il aprelin 11-nə təyin edilib.
Fevralın 8-də Yeni Azərbaycan Partiyasının VI qurultayında İ.Əliyevin prezidentliyə namizədliyi rəsmi olaraq təsdiqlənib.
Müxalif Müsavat və Xalq Cəbhəsi partiyaları, Milli Şura seçkilərin antidemokratik şəraitdə keçirildiyini bildirirlər və bu səbəbdən də ona qatılmaqdan imtina ediblər.
15-ə qədər partiya sədri, deputat və fərdi şəxs prezidentliyə namizədliklərini irəli sürüb.