“Müsəlman Birliyi” Hərəkatının üzvü Elvin Muradov (Mürvətoğlu) bugün, sentyabrın 25-də Nərimanov Rayon Məhkəməsinin qərarı ilə 2 il 3 ay müddətinə azadlıqdan məhrum olunub.
Bu barədə AzadlıqRadiosuna Elvin Mürvətoğlunun yaxınları məlumat verib.
Onların sözlərinə görə, hakim Tural Ələkbərovun sədrliyi ilə keçirilən prosesdə Elvin Mürvətoğlu özünü təqsirli bilməyib.
“Müsəlman Birliyi” Hərəkatının üzvü, şair Elvin Mürvətoğlunu polis bu il martın 13-də saxlamışdı. Martın 14-də onun barəsində Nərimanov Rayon Məhkəməsinin qərarı ilə 3 aylıq həbs-qətimkan tədbiri seçilmişdi.
Elvin Mürvətoğlu Cinayət Məcəlləsinin (CM) 228.1-ci (Qanunsuz odlu silah saxlama) maddəsi ilə ittiham edilib.
Yaxınları isə bildirmişdilər ki, o, martın 13-də məscidə cümə namazı qılmaq üçün gedəndən sonra yoxa çıxıb.
Buna da bax: Həbsdəki inanclı fəalın anası: 'Ağrıdan qovrulur, ona dərman verilmir'
Nardaran hadisələri
Elvin Mürvətoğlunun yaxınları ittihamı qəbul etmirdilər və bunun uydurma olduğunu bildirirdilər. Onların iddialarına görə, Elvin Mürvətoğlu “Müsəlman Birliyi” Hərəkatının sədri Taleh Bağırova həsr etdiyi mahnı oxuduğuna görə həbs olunub.
Taleh Bağırovun özü isə 2015-ci ildə baş verən Nardaran hadisələri zamanı həbs edilib.
Nardaran hadisələrində 2-si polis olmaqla 6 nəfər həlak olub.
Taleh Bağırov və onlarla şəxs həbs edilib.
Onlar qəsdən adamöldürmə və başqa cinayətlərdə ittiham ediliblər.
Amma müttəhimlər bu ittihamları qəbul etmirlər. Taleh Bağırov 20 il həbs cəzası alıb.