Kanada Rusiyanın Böyük yeddilər – G7 qrupunun sammitinə qatılmasına qarşıdır.
Belə bir ideya ilə bir gün əvvəl ABŞ prezidenti Donald Trump çıxış etmişdi.
Reuters agentliyinin yazdığına görə Kanadanın baş naziri Justin Trudeau deyib ki, Moskva beynəlxalq qanunlara qarşı sayqısızlığını davam etdirir:
"Rusiya G7 qrupundan bir neçə il bundan əvvəl Krıma müdaxilə etdiyinə görə, beynəlxalq qanun və normalara hörmətsizliyinə və sayqızılığına görə xaric edilib və bu səbəbdən də G7 qrupundan kənarda qalıb və qalmaqda davam edəcəkdir”.
ABŞ prezidenti Donald Trump mayın 30-da demişdi ki, o, G7 liderlərinin sammitini sentyabradək təxirə salacaq və bu tədbirdə Avstraliya, Rusiya, Cənubi Koreya və Hindistanın da iştirakını görmək istərdi.
Trump belə bir təkliflə çıxış etdiyini iyunun 1-də Rusiya prezidenti Vladimir Putinə də onunla telefon söhbəti zamanı bildirmişdi.
Kanada baş naziri “Putin bu tədbirə qatılarsa, sammiti boykot edib-etməyəcəyi” barədə suala cavab verməyib, amma bildirib ki, sammitə qədər hələ “bir çox müzakirələrə” ehtiyac var.
Buna da bax: Trump Putinə zəng edib
G7 “müttəfiqlər və dostlarla səmimi söhbət” üçündür
Trudeau bunu da əlavə edib ki, Rusiyanın üzv olduğu G20 qrupu da var və “biz orada yaxşı münasibətimiz olmayan üzvlərlə də görüşürük”.
Onun fikrincə, G7-yə gəlincə, bu “müttəfiqlərin və dostların səmimi söhbət yeridir və o bunun belə davam etməsini istərdi”.
Dünyanın ən çox sənayeləşmiş ölkələrinin G7 qrupuna ABŞ, Kanada, Fransa, Almaniya, İtaliya, Yaponiya və Britaniya daxildir.
Rusiya əvvəllər G8 adlanan bu qrupun üzvlüyündən 2014-cü ildə Moskva Krım yarımadasını Ukraynadan qanunsuz ilhaq etdikdən sonra prezident Barack Obamanın təşəbbüsü ilə xaric edilib.
Trump Rusiya prezidenti ilə yaxşı münasibətlərə can atdığına görə bir qayda olaraq demokratlar tərəfindən tənqid edilir.
The Hill qəzeti yazır ki, Nümayəndələr Palatasının demokratları bu yaxınlarda prezidentdən Rusiyaya 5, 6 milyon dollarlıq süni tənəffüs aparatlarının göndərilməsi səbəbi barədə izahat istəyiblər.